Staking se einde steeds nie in sig
2010-08-28 08:42
Kaapstad. – Stakende staatswerkers in die noodsaaklike dienstesektor is gister gewaarsku hulle tree onwettig op as hulle nie onmiddellik na hul poste terugkeer nie.
Dit kom nadat die minister van staatsdiens en administrasie, Richard Baloyi, Donderdagaand sonder sukses met vakbonde vergader het om die dooie punt rondom loononderhandelings opgelos te kry.
Tot dusver is daar egter nog geen einde in sig vir die staking wat al twee weke duur nie. Baloyi se woordvoerder, Dumisani Nkwamba, het aan Volksblad gesê die eise gaan die regering R22,9 miljard uit die sak jaag.
“Alle werkers in die noodsaaklike dienstesektor moet dringend na hul poste terugkeer,” het Baloyi gister in ’n verklaring gesê. “Nie net word dit vereis ingevolge die Wet op Arbeidsbetrekkinge nie, maar ook ingevolge ’n hofbevel.”
Aangesien die regering nog nie ’n minimum diensvlakooreenkoms met vakbonde bereik het nie – wat onder meer bepaal wat die minimum werkers is wat benodig word in die noodsaaklike dienstesektor – moet al dié werkers nog by die vereistes van die wet hou.
Intussen het Cosatu op ’n nuuskonferensie in Johannesburg gesê hy is baie bekommerd oor die uitwerking van die staking op arm gemeenskappe en die werkersklas.
- Volksblad