Staking nie ál rede vir swak gr. 12’s
2010-08-30 09:01
Johannesburg - As vanjaar se matrikulante in die eindeksamen swak vaar, sal die landwye staking nie die enigste rede daarvoor wees nie.
Chris Klopper, uitvoerende hoof van die Suid-Afrikaanse Onderwysersunie (SAOU), het die naweek by ’n onderwyskonferensie van die Afrikaanse Taalraad (ATR) in Kaapstad gesê talle van vanjaar se matrikulante het reeds op laerskool nie die mas opgekom nie.
Hy het gesê toe vanjaar se matriekklas in 2001 in gr. 3 was, was hul gemiddelde slaagsyfer vir geletterdheid 30%.
Toe hulle ’n paar jaar later weer getoets is, het net 15% van hulle gesyferdheid op die toepaslike vlak geslaag.
Hul gemiddeld vir gesyferdheid was toe 36%.
“Die gehalte onderrig wat die meerderheid leerlinge op laerskool kry, is glad nie goed nie,” het Klopper gesê.
Hy het ook verwys na ’n opname wat in 2008 gedoen is waartydens die vaardighede van onderwysers in provinsies soos KwaZulu-Natal getoets is.
Van die onderwysers het gemiddeld 40% behaal toe hulle vraestelle vir gr. 1 tot gr. 4 moes beantwoord.
Hulle het gemiddeld 33% behaal vir vraestelle in wiskunde vir gr. 4 tot gr. 7.
“Dis die gehalte van onderwys wat moet aandag kry.
“Dit help nie om aan die einde van matriek hoërskole die skuld vir kandidate se swak prestasie te gee nie.
Hoërskole kan niks doen as leerlinge by hulle opdaag wat nie basiese geletterdheid- en gesyferdheidvaardighede het nie,” het hy gesê.
Met verwysing na Afrikaanse skole het Klopper gesê dié sowat 2 300 skole verteenwoordig minder as 10% van al die openbare skole in die land.
“As ’n minderheid het ons egter ’n rol om te vertolk en ons moenie langer net met lippediens van die regering tevrede wees nie.
Die ANC moet oortuig word van die belangrikheid van Afrikaans vir wit en bruin gemeenskappe.”
Hy het ook verwys na die noodsaaklikheid dat meer Afrikaanse onderwysers opgelei word om in toekomstige behoeftes te voorsien.
Van al die instellings waar onderwysers in Afrikaans kan studeer, voltooi 307 vanjaar hul studies aan die Universiteit van Pretoria (UP).
By die Noordwes-Universiteit is dit 474, by die Universiteit van Stellenbosch 78, by die Universiteit van die Vrystaat 159 en by die Universiteit van Johannesburg 30.
Jonavan Rustin, verteenwoordiger van die Suid-Afrikaanse Demokratiese Onderwysersunie (Sadou) in die Wes-Kaap, het ook gesê die staking sal nie alleen vir die swak prestasie van leerlinge verantwoordelik gehou kan word nie.
“As ’n mens kyk na die uitslae en slaagsyfer van matrikulante in 2007 toe daar ook ’n groot staking was, sal jy sien dat dit nie veel verskil het van vorige jare s’n nie.”
Intussen gaan die landwye staking vandag voort met net sommige skole wat met die rekordeksamen voortgaan, terwyl dit in die meeste skole en in provinsies soos Gauteng uitgestel is.
- Beeld