Staking in Wes-Kaap ‘nie verby’
2013-01-17 11:29
Kaapstad – Die plaaswerkerstaking in die Wes-Kaap is nie opgeskort nie, het die Black Association of the Wine and Spirit Industry (Bawsi) Donderdag gesê.
“Die staking in die provinsie sal voortgaan totdat ‘n ooreenkoms vir beter lone en die beskerming van werkers bereik word,” het Nosey Pieterse, president van Bawsi en die algemene sekretaris van die Building and Allied Workers Union of SA (Bawusa), gesê.
“Werkers wat terugkeer loop ‘n groot risiko. Hulle gaan terug na wraaksugtige boere, meer afleggings, viktimisasie en intimidasie, dieselfde ou lewe, dieselfde ou geld.”
Pieterse, wat sê hy verteenwoordig duisende stakende werkers, het van ‘n voorbeeld van viktimisasie in Piket-Bo-Berg vertel.
Boere in die gebied het werkers glo Dinsdag genooi om terug te keer werk toe en met hul terugkeer is 41 van hulle afgedank.
Die Congress of SA Trade Unions (Cosatu) het Woensdag bekendgemaak dat die staking vir ‘n week afgelas sal word.
Tony Ehrenreich, die provinsiale sekretarris, het gesê die staking sal volgende Woensdag voortgaan, behalwe as Agri SA tot sekere voorwaardes instem.
“Die enigste ding waaroor Agri SA eintlik moet saamstem is dat hulle nie werkers sal viktimiseer omdat hulle opstaan en betoog teen die loon van R69 per dag nie.”
– Volg Nuus24 op Twitter
- SAPA
