Staking gaan beslis voort, sê vakbonde
2010-08-21 11:08
Kaapstad - Leë skoolbanke, stil hofgange, geslote
deure by staatsdepartemente en dansende betogers voor hospitaalingange
was gister die gesig van die staatsdiensstaking in die Wes-Kaap.
Agt voorvalle van intimidasie is by die Wes-Kaapse onderwysdepartement aangemeld, aldus me. Bronagh Casey, woordvoerder.
Teen
middagete het die stakers op die meeste plekke hul fut verloor en
verdaag, maar vakbonde het gewaarsku die staking gaan volgende week
voort en sal “groter” as die afgelope twee dae s’n wees.
Die
beginsel van geen werk, geen betaling geld. “Die mense wat nog niks geld
verloor het nie, gaan oor die naweek skaam kry en volgende week by ons
aansluit,” meen mnr. James Kruger, Wes-Kaapse voorsitter van Nehawu.
Een
van die grootste onderwysvakbonde, die Suid-Afrikaanse Onderwysersunie
(SAOU), se lede staak ook van Maandag af, wat nóg leër klaskamers tot
gevolg kan hê.
Gister was 116 van die 1 456 Wes-Kaapse skole gesluit en 5 801 van die 31 808 onderwysers het nie vir werk opgedaag nie.
Verskeie
hofsake moes uitgestel word omdat stenograwe, tolke en administratiewe
klerke van landdroshowe in Kaapstad, Khayelitsha, Goodwood en Wynberg
asook die streekshof in Kaapstad gestaak het, aldus me. Suraya
Joewoodeen, provinsiale sekretaris van Nehawu.
’n Groep van sowat
50 mense het plakkate in die lug geswaai, gesing en op vuvuzelas
geblaas voor en oorkant die provinsiale parlement se kantore in
Waalstraat.
Altesaam 144 gesondheidswerkers uit ’n totale
werkerskorps van 28?067 het by onder meer Tygerberg- en Groote
Schuur-hospitaal gestaak, het me. Hélène Rossouw, ’n woordvoerder van
die departement van gesondheid, gesê.
Sowat 200 mense het voor
die Groote Schuur-hospitaal saamgedrom en die ingang versper. By die
Tygerberg-hospitaal het ’n groep van sowat 30 mense deur die
hospitaalgange geloop en betoog, berig Jaco Marais.
Ander staatsdienskantore, soos dié van die departement van arbeid, is ook gesluit.
“Mense
gebruik hul laaste geld vir ’n taxi om hul werkloosheidsversekering te
gaan opeis. Dan kom hulle daar en sien die plek is toe oor die staking.
En dan is daar nie geld om by die huis te kom nie,” het mnr. Ashley
McKay (37) van Ravensmead gister gesê.
Vakbonde eis ’n
salarisverhoging van 8,6% en ’n behuisingstoelae van R1?000. Die
regering se aanbod is ’n 7%-salarisverhoging en ’n behuisingstoelae van
R700.
Geen voorvalle van geweld en intimidasie is by die polisie
aangemeld nie, het kol. Billy Jones, provinsiale polisiewoordvoerder,
gesê.
- Die Burger