Staking by Gold Fields duur voort
2012-09-17 17:31
Johannesburg – ‘n Staking by Gold Fields se KDC-Wes-skagte by Carletonville aan die Wes-Rand het Maandag voortgeduur, het Sven Lunsche, woordvoerder vir die maatskappy, gesê.
“Die werkers het nie teruggekeer werk toe nie,” het Lunsche gesê.
Die maatskappy sal voortgaan om te onderhandel met die National Union of Mineworkers (NUM) wat die stakende werkers verteenwoordig.
NUM verteenwoordig sowat 80% van die 15 000 werknemers wat nie werk nie.
“Ons hoop om binnekort vordering te maak,” het hy gesê.
Lunsche sê dit kan dalk stadiger vorder as wat hulle gehoop het, aangesien die NUM se nasionale leierskap by Cosatu se 11de nasionale konferensie in Midrand was.
Die situasie oor die naweek was oor die algemeen stil, maar twee mynwerkers wat Sondag werk toe wou gaan, is gewelddadig aangerand.
“Voorvalle van intimidasie het gisteraand (Sondagaand) plaasgevind,” het Lunsche gesê.
“Dit gaan nou beter met hulle. Hulle het behandeling ontvang,” het hy gesê.
Die staking het verlede Sondag begin.
– Volg Nuus24 op Twitter
- SAPA
