Staking: Vakbonde nié beïndruk met aanbod
2011-07-19 12:08
Johannesburg – Die vakbond Ceppwawu, wat werkers in die petroleum- en farmaseutiese sektor verteenwoordig, sê hy is nie beïndruk met die werkgewers se nuutste aanbod nie.
Werkgewers het hul oorspronklike aanbod van 'n salarisverhoging van tussen 4% en 7% na tussen 8% en 10% verander.
Ceppwawu-lede het verlede week begin staak en eis 'n salarisverhoging van tussen 11% en 13%. Die vakbond Solidariteit het Maandag by die staking aangesluit.
Die betrokke partye het Maandag sowat 12 uur lank vergader.
Mxolise Ratsibe van die Suid-Afrikaanse Petroleumvereniging sê hulle is teleurgesteld dat hul aangepaste aanbod nie goed deur verteenwoordigers van die vakbond ontvang is nie.
Simon Mofokeng van Ceppwawu het gesê hulle sal Dinsdag met hul lede vergader oor die aanbod.
Dirk Hermann van Solidariteit het gesê die nuwe aanbod is 'n stap vorentoe, maar daar is steeds brandende kwessies wat nie aangespreek word nie.
Die staking duur voort.
– Lees meer hier
– Volg Nuus24 op Twitter