Stakende werkers vasgetrek
2011-03-07 18:00
Johannesburg – Sowat 22 lede van die die munisipale vakbond Samwu is Maandag in Kempton Park in hegtenis geneem vir publieke geweld, intimidasie en aanranding.
Volgens Zweli Dlamini, woordvoerder vir die Ekurhuleni-munisipaliteit, was die verdagtes glo deel van ‘n groep van sowat 100 stakers wat amok in die stad gesaai het.
“Geen voorvalle van boewery of vandalisme sal geduld word nie,” het Dlamini in ‘n verklaring bekend gemaak.
“Die munisipaliteit kan nie net terugstaan en kyk hoe werkers onwettig optree en ander intimideer wat nie by die stakings betrokke wil wees nie.”
Na bewering is daar verskeie voorvalle aangemeld waar nie-stakende-werkers geïntimideer is en vragmotors aan die brand gesteek is.
Dlamini het beklemtoon dat die munisipaliteit bereid is om onderhandelings met Samwu te ondergaan om die stakings stop te sit.
Volg Nuus24 op Twitter.
- SAPA