Stafsersant geskors ná skêr-aanval
2010-10-26 08:37
Pretoria - Die stafsersant in die weermag wat sowat twee weke gelede haar meerdere, ’n sersantmajoor, met ’n skêr bygedam het, is summier uit die weermag geskors.
Die skorsing is in opdrag van lt.genl. Solly Shoke, leërhoof. Sy sal nou voor ’n geskiktheidsraad verskyn om te bepaal of sy in die weermag mag aanbly.
Stafsers. Kholiswa Mashalaba van die Algemene Steunbasis Wes-Kaap by Youngsfield in Kaapstad staan tereg op ’n aanklag van poging tot moord.
Ao1. Moos Baartman, haar toesighouer by die logistieke afdeling van die eenheid, het Mashalaba onlangs ingeroep omdat sy blykbaar gereeld Maandae nie by die werk is nie.
Sy het na bewering ’n skêr tussen haar borste onder haar klere versteek en tydens Baartman se berisping, hom glo in die voorkop, agterkop, nek en rug gesteek.
Sy is ná die voorval en haar verskyning in die landdroshof op borgtog vrygelaat. Sy is weer deur die militêre polisie in hegtenis geneem weens ’n beweerde dreigement teen ’n ooggetuie in die saak. Sy is egter nie weer aangehou nie.
Die afgelope week het familie van Baartman gekla dat sy bloot na ’n ander afdeling oorgeplaas is en dat die weermag vroeër en fermer moes optree.
Volgens die familie is dit glo ook nie die eerste keer dat Mashalaba weens weerspannigheid van een afdeling na ’n ander oorgeplaas word eerder as om haar vas te vat.
Die familie sê hulle wil weet of die weermag wag dat iemand in ’n bloedbad sterf voor hulle teen iemand optree terwyl al die waarskuwingsligte in dié geval herhaaldelik geflikker het.
Baartman het ’n skoon rekord van meer as 30 jaar diens in die weermag. Volgens die familie is Mashalaba se optrede vir hom ’n ernstige klad op sý naam.
“Hy was nog altyd trots op die hoë gehalte van werk wat sy afdeling gelewer het en hy het geglo op dié manier dien hy en sy ondergeskiktes die weermag.
“Hy vind dit bitter moeilik om in ’n omgewing waar sy gesag ondergrawe word en geen respek vir senior range ter sprake is nie, sy roeping na te streef,” het een familielid gesê. Baartman is tans met siekverlof by die huis.
Kort nadat Beeld, noordelike susterskoerant van Die Burger, navraag gedoen het oor die stand van Mashalaba se skorsing, is die proses glo bespoedig en is sy toegang tot die eenheid verbied.
Sy verskyn vroeg in November weer in die landdroshof.
- Die Burger