Stadsraad slaan ’n slag oor tolpadprojek
2011-12-07 09:04
Kaapstad – Die Kaapstadse stadsraad het Dinsdag die jongste ronde gewen om die N1- en N2-Wynland-tolprojek vir eers te stuit.
Die Suid-Afrikaanse Nasionale Padagentskap (Sanral) het met die stadsraad ooreengekom om voorlopig geen verdere stappe in die tolpadprojek te doen nie.
Die ooreenkoms geld terwyl die stadsraad en Sanral in ’n interregeringsdispuut betrokke is en die stadsraad besluite laat hersien wat die ministers van omgewingsake en van vervoer oor die voorgestelde tolpaaie geneem het.
“Dit is ’n belangrike oorwinning vir die stadsraad. Ons glo dat die bekommernisse van inwoners van Kaapstad nou behoorlik heroorweeg sal word,” het Brett Herron, burgemeesterskomiteelid vir vervoer, paaie en stormwater, in ’n verklaring gesê.
’n Aansoek om ’n interdik deur die stadsraad teen Sanral wat Dinsdag in die Wes-Kaapse hooggeregshof aangehoor sou word, is teruggetrek nadat Sanral ingestem het om verdere stappe in die projek eers te los.
“Die stadsraad het sy regte en belange beskerm deur die ooreenkoms met Sanral te verseker en daarom is die aansoek om ’n interdik teruggetrek.”
Die ooreenkoms met Sanral is juis dié onderneming wat die stadsraad die laaste maande wou gehad het en waarom hy in ’n stadium genoop was om ’n interdik teen Sanral te probeer kry, het Herron gesê.
Een van die stadsraad se vrese is dat die tolpaaie veral gemeenskappe met inwoners uit die lae-inkomstegroep en woonbuurte waar daar tradisioneel swart mense woon, sal benadeel.
– Volg Nuus24 op Twitter
- Die Burger