Stad dalk weer Nelspruit
2010-11-06 07:17
Nelspruit - Nelspruit was Mbombela, maar gaan nou waarskynlik weer Nelspruit word.
Dít is weens ’n tegniese fout wat Lulu Xingwana, destyds minister van kuns en kultuur, in Oktober begaan het toe sy die stad se naamsverandering in die Staatskoerant aangekondig het.
Die naam was veronderstel om na Mbombela City te verander, maar dit is toe net as Mbombela geproklameer.
Raadslede van die Mbombela-munisipaliteit het eergisteraand toegegee dat die naam verkeerdelik aangekondig is.
’n Verslag om te bevestig dat die naam amptelik verander is, het voor die raad gedien, maar toe het Gerhard de Bruin, DA-leier in die raad, op die tegniese fout gewys.
Volgens hom was die DA se standpunt nog altyd dat Nelspruit se naam nie dieselfde as die munisipaliteit kan wees nie.
Lassy Chiwayo, burgemeester, het gesê hy stem saam dat die saak na die minister terugverwys moet word.
Hy het bygevoeg hy is in elk geval nie tevrede met die proses wat destyds gevolg is toe daar met die publiek oor die naamsverandering gepraat is nie.
Tydens die openbare konsultasieproses wat sowat drie jaar gelede plaasgevind het en wat baie swak bygewoon is, het net sowat 220 mense uiteindelik vir ’n naamsverandering gestem.
’n Groot aantal besware teen die naamsverandering wat destyds deur sakelui en lede van die Laeveldse kamer van handel en toerisme (LCBT) ingedien is, is nooit in ag geneem nie.
Chiwayo het op die vergadering gesê daar is ooglopend baie ongelukkigheid oor die proses wat gevolg is.
Hy het gesê die 23 000 handtekeninge wat die LCBT skaars vier weke gelede in ’n petisieveldtog ingesamel het, bevestig hoe ongelukkig inwoners is.
“Ek wil binne twee weke ook met al die rolspelers wat belang by die naamsverandering het, vergader sodat ons almal se menings op die tafel kan kry.”
Dié stelling het ’n gemor en roerings onder ander ANC-raadslede veroorsaak.
Toe mnr. Bhaba Nkosi, ’n burgemeesterskomiteelid en een van die mees senior ANC-lede in die raad, egter sy steun aan Chiwayo se voorstel toesê, het die gemor opgehou.
Die raad het toe eenparig besluit om die saak nie net na Mpumalanga se pleknaamkomitee te verwys nie, maar om die minister ook op die fout te wys.
’n Wysiging sal nou gepubliseer moet word.
Die LCBT is volgens me. Linda Grimbeeck, woordvoerder, verheug oor die raadsbesluit.
“Dit was juis die tegniese punt wat ons gaan gebruik in die regstappe wat ons teen die regering gaan doen om Nelspruit se naam terug te kry.
“Ons sal nou moontlik die geleentheid hê om sonder om koste aan te gaan weer beswaar teen die naam aan te teken.”
Die LCBT het Johan du Preez van die prokureursfirma Kruger Moeletsi reeds aangestel om die openbare konsultasieproses wat gevolg is te ondersoek.
Die moontlikheid is nie uitgesluit nie dat ’n dringende aansoek daaroor by die hooggeregshof ingedien sal word.
Belastingbetalers sal na raming sowat R160 miljoen moet opdok vir al die veranderinge wat uit ’n nuwe naam vir die stad sal spruit.
“Ons kan dit nie bekostig nie. Daarom beveg ons die saak,” het Nic Elliot, president van die LCBT, vroeër gesê.
- Beeld