Stad Kaapstad waarsku stakers
2011-08-16 18:56
Kaapstad – Die Stad Kaapstad het stakende munisipale werkers gewaarsku dat die stad “sal optree soos nodig is” om die stad se eiendom te beskerm nadat ‘n betoging vir loonverhogings Dinsdagoggend in die middestad gewelddadig geword het.
“As Samwu (die Suid-Afrikaanse Munisipale Werkersunie) aanhou optree op die manier wat tot nou toe die geval was, sal die stad geen ander opsie hê nie as om op watter manier ook al wettiglik nodig is op te tree om die veiligheid van die stad se werknemers, die gemeenskap en openbare eiendom te beskerm,” het Demetri Qually, lid van die burgemeesterskomitee vir Korporatiewe Dienste, gesê.
Die stad het gesê ‘n interdik teen die voortduur van die staking sal as gevolg van die geweld gesoek word.
Vroeër Dinsdag het munisipale werkers straatverkopers se goedere gebuit, plastiekdromme aan die brand gesteek en die vensters van voertuie gebreek tydens hul betoging in die middestad.
Die stad se hoof-inkopiestraat, Adderleystraat, is vol vullis en uitgebrande dromme gelaat.
Verskeie straatverkopers wat goedere soos kosmetiese middels, koffie, beursies en belte op die sypaadjies verkoop, het mettertyd weer die goedere uitgepak wat hulle weggesteek het soos die betogers nadergekom het.
Winkels in die straat het hul deure gesluit soos die werkers nadergekom het.
Die parlement, wat naby die bopunt van Adderleystraat geleë is, is ook deur die polisie afgesper.
Dertien betogers is in hegtenis geneem en sal van openbare geweld aangekla word, het die polisie gesê.
Samwu dring aan op ‘n loonverhoging van 18 persent. Die Suid-Afrikaanse Vereniging vir Plaaslike Regerings (Salga) bied ‘n verhoging van ses persent aan.
Die landwye staking het Maandag begin.
Volgens die Stad Kaapstad was 5 170, of 21 persent, van werknemers sonder toestemming Dinsdag afwesig van die werk af.
- Volg Nuus24 op Twitter
- SAPA