Staatsrede fokus meestal op werkskepping
2011-02-10 21:29
Kaapstad – Die fokus van President Jacob Zuma se derde staatsrede Donderdagaand vanuit die parlement in Kaapstad het meestal gefokus op werkskepping.
Zuma het die regering en privaatsektor gevra om werk te skep, en het miljarde rande opsy gesit om dit reg te kry.
Die president het verder in sy staatsrede gesê dat elke sektor en elke sake-eenheid op werkskepping moet konsentreer.
“Die regering sal oor die volgende drie jaar 'n fonds van R9 miljard op die been bring vir werkskepping,” het Zuma beloof.
Die staatsbeheerde nywerheidsontwikkelingskorporasie het ook R10 miljard opsygesit om te belê in gebiede wat 'n hoë potensiaal het om werk te skep.
Zuma het ook R20 miljard se belastingtoegewings aangekondig om privaatsektor-beleggings en uitbreiding in die vervaardigingssektor te bevorder.
Nelson Mandela:
Hy het ook in toespraak na die gesondheid van Nelson Mandela verwys. Hy gesê Suid-Afrikaners moet die realiteit aanvaar dat oudpresident Nelson Mandela "nie meer jonk is nie".
"Hy sal van tyd tot mediese fasiliteite besoek. Dit is normaal vir iemand van sy ouderdom. Ons moet hom toelaat om dit met waardigheid te doen en sy familie se privaatheid respekteer. Ons skuld hom dit... vir sy bydrae," het Zuma gesê oor Mandela se onlangse opname in die hospitaal en die media se dekking daarvan.
Kragbesparing:
"Ons moet almal krag spaar sodat ons nooit weer beurtkrag hoef te gebruik om krag te spaar nie," het Zuma gesê nadat hy genoem het dat Eskom meer as R75 miljard belê het om kragtoevoer te verseker.
Die meeste van hierdie fondse word in nuwe kragstasies belê. "Skakel implemente in jou huis af as jy dit nie gebruik nie,” het hy aangemoedig.
Zuma het ook verwys na Suid-Afrika se mynbates. Teen 2009 was die mynbedryf verantwoordelik vir 30% van die land se uitvoer-inkomste.
"Na skatting sal ons ons mynbates nog meer as 100 jaar kan ontgin. Om die potensiaal van die bedryf te benut het die regering die African Exploration, Mining and Finance Corporation as die staat se mynmaatskappy onderskryf wat die myn van minerale van strategiese belang sal behartig,” het hy gesê.
Misdaad:
Zuma noem op die misdaadfront dat die kapasiteit en effektiwiteit van die polisie, veral wat speurdienste, forensiese analise en misdaadintelligensie betref, steeds verbeter.
"Ons howe hou aan om al hoe beter te funksioneer, en die programme om agterstande te verminder, vorder goed. Ons sal aanhou om misdade teen vroue en kinders as ‘n prioriteit te beskou.
Ons wil saamwerk met gemeenskappe en ander rolspelers om dwelmhandel en dwelmmisbruik, wat sommige gemeenskappe uit mekaar skeur, te takel."
Die president het ook melding gemaak van die daling in die misdaadsyfer.
Een nasie:
Zuma het sy toespraak afgesluit deur te sê die regering se doel is duidelik.
“Ons wil ‘n land hê waar miljoene Suid-Afrikaners ordentlike werkgeleenthede kan hê, met ‘n moderne infrastruktuur en ‘n lewendige ekonomie, waar lewensgehalte hoog is. Ons almal het ‘n verantwoordelikheid om hard te werk om dit ‘n realiteit te maak.”
Volg Nuus24 op Twitter.
Kliek hier vir hooftrekke uit die president se staatsrede.