Staatsrede: Zuma moet rigting gee oor onderwys
2013-02-14 08:15
Johannesburg – Die onderwysorganisasie Equal Education het gesê pres. Jacob Zuma moet sy staatsrede Donderdagaand gebruik om ernstig oor die uitdagings vir onderwys in Suid-Afrika te praat.
"Soos die regering nader beweeg aan die verkiesing in 2014, sal hulle gevra word wat hulle gedoen het om die gehalte van onderwys te verbeter en om die gaping tussen voormalige Model C-skole en ou swart skole te verklein," het die organisasie Dinsdagoggend in 'n verklaring gesê.
"Oudpres. Thabo Mbeki en pres. Zuma het albei gesê daar sal met skole in modderhutte weggedoen word. Baie min vordering is gemaak, wat leerders dwing om met hulle onderrig voort te gaan in onvanpaste strukture."
Daar is steeds 495 skole in modderhutte in die land, het die organisasie gesê. Volgens EE is planne in 2011 aangekondig om dié skole te vervang, maar geen vordering is gemaak nie.
"Hulle het befondsing ontvang om dié 495 skole teen 2014 te herbou. Hulle het 49 modderhutskole in die Oos-Kaap geïdentifiseer wat teen die einde van die 2011/2012- finansiële jaar herbou sou word," het die organisasie gesê.
"Teen die einde van die jaar het hulle nog nie een van daardie skole [herbou] nie."
Baie skole het ook nie water, sanitasiegeriewe en elektrisiteit nie, het die groep gesê.
Die land het 24 793 gewone skole. Altesaam 3 544 van dié skole het nie elektrisiteit nie, en 804 daarvan het net sporadies krag.
Meer as 2 000 skole het geen watertoevoer nie en nog 2 611 skole se watertoevoer is onbetroubaar, het die organisasie gesê.
– Volg Nuus24 op Twitter.
- SAPA
