Staatsamptenaar vas oor versekeringsbedrog
2013-01-12 08:30
Johannesburg – 'n Amptenaar van die departement van binnelandse sake in Isipingo wat na bewering by 'n versekeringsbedrogspul betrokke was, is Vrydag in hegtenis geneem, het die KwaZulu-Natalse polisie gesê.
Die 29-jarige amptenaar is die sesde verdagte wat na bewering betrokke was by die sindikaat, wat geld van ander mense se begrafnispolisse gesteel het, het kol. Vincent Mdunge in 'n verklaring gesê.
Die sindikaat het na bewering lewende mense se identiteitsdokumente gebruik om hulle as oorlede by die departement te registreer.
R50 000 is uit een man se begrafnispolis by die Momentum-versekeringsmaatskappy gesteel.
Die polisie het die eerste lid van die sindikaat, Jackson Zungu, op 12 Desember in Pinetown in hegtenis geneem.
John Mhlangu van Stanger is kort daarna aangekeer. Mhlangu het na bewering die mense se besonderhede aan Zungu verskaf.
Sibongiseni Thabethe en Mbongeni Majola is op 13 Desember in Durban in hegtenis geneem. Thabethe is verlede jaar in Oktober in verband met 'n soortgelyke misdaad aangekeer.
'n Vyfde verdagte, Patros Dlamini, is op 14 Desember in hegtenis geneem.
Die jongste verdagte wat aangekeer is, het na bewering die nodige vorms van die departement gesteel, en dan die lewende teiken se besonderhede geregistreer sodat 'n doodsertifikaat verkry kan word.
– Volg Nuus24 op Twitter.
- SAPA
