Staat se diamant-mpy bankrot, sê VF+
2011-03-10 15:23
Pretoria – Die staat se diamant-mynmaatskappy is effektief bankrot.
"Indien mens ooit ‘n bewys wou hê wat met ons land se myne sou gebeur indien dit genasionaliseer word, hoef mens net na die Alexkor-fiasko te kyk,” het adv. Anton Alberts, die Vryheidsfront Plus se parlementêre woordvoerder oor mineralebronne, gesê.
Volgens die Ouditeur-Generaal se oudit uitkomste verslag vir 2009/2010 het die maatskappy nie genoeg kontantreserwes om aan sy operasionele kontantvloei-vereistes te voldoen nie.
Die Ouditeur-Generaal het ook ernstige bedenkinge oor die staatsmaatskappy se vermoë om as 'n besigheid in die langtermyn voort te bestaan, indien daar nie ‘n vennootskap met die plaaslike gemeenskap aangegaan word en met volhoubare mynaktiwiteite begin word nie.
“Hierdie bevinding moet gelees word teen die agtergrond van sekere elemente in die ANC, veral onder die 'reuse intellektuele leierskap' van Julius Malema, wat aan die mense van Suid-Afrika voorskryf dat die nasionalisering van myne in belang van almal sal wees.
“Malema het verlede naweek weer gesê dat tot 60% van myne genasionaliseer moet word, met spesifieke verwysing na Anglo-American,” het Alberts bygevoeg.
Die VF Plus het vrae in die parlement aan die minister van mineralebronne gestel waarin gevra word hoe die staat se mynmaatskappye befonds word.
Indien belastingbetalers se geld gebruik word, sal dit 'n skande wees en sal die party verdere stappe oorweeg om die vermorsing te staak.
Volg Nuus24 op Twitter
- Nuus24