Staat moet betaal ná huis brand
2010-09-01 09:21
Johannesburg – ’n Egpaar moet skadevergoeding van R720 000 by die Gautengse regering kry nadat ’n veldbrand hul grasdakhuis en -lapa verwoes het.
’n Skikkingsooreenkoms is tussen die provinsiale regering en Willem en mev. Maria le Hanie bereik.
Die ooreenkoms is vandeesweek ’n bevel van die hooggeregshof in Pretoria gemaak.
Luidens die bevel sal die Gautengse regering ook rente van R80 000 op die kapitaalbedrag aan die egpaar betaal.
Albei bedrae moet teen 30 September betaal word, anders sal rente daarop gehef word.
Die Le Hanies van Bosfontein, Heidelberg, het as trustees van die Le Hanie-familietrust ’n skadevergoedingseis teen die provinsiale regering ingestel.
Die trust is die eienaar van die plaas Boskloof in die distrik Heidelberg.
Die Gautengse regering is die eienaar van die aangrensende plaas, die Suikerbosrand-natuurreservaat.
Luidens die egpaar se hofstukke het die Gautengse regering op 4 September 2007 ’n brandstrook in die natuurreservaat gemaak.
Die veldbrand het na die trust se plaas versprei.
Die brand het die Le Hanies se veld, ’n grasdakhuis, ’n grasdaklapa en die inhoud van dié twee strukture verwoes en skade van R1 058 639 veroorsaak, lui die hofstukke.
Dit lui voorts die brande is begin in ’n poging om ’n brandstrook te skep terwyl dit gevaarlik was om sulke brande te begin.
Die brande vir die brandstrook is nie behoorlik geblus nie of daar was nie behoorlike toesig om toe te sien dat dit behoorlik geblus is nie.
Die brande het gevolglik weer begin en kon nie beheer word toe dit vasgestel is nie, lui die hofstukke.
Die verweerder het die aantygings in hofstukke ontken
Volg Beeld op Twitter.
- Beeld