Staat lê beslag op R230 milj. se bates in Fidentia-saak
2012-07-01 15:51
Johannesburg – Die staat het beslag gelê op R230 miljoen se bates van Noel Cunningham, ‘n beskuldigde in die Fidentia-bedrogsaak, het die Sunday Independent berig.
Cunningham word daarvan beskuldig dat hy R150 miljoen van Fidentia Holdings gesteel het.
Daar is beslag gelê op huise, voertuie en geld.
“Dit is een van die batebeslagleggings met die hoogste waarde, nie net in die Wes-Kaap nie, maar landswyd,” het Klaas van Zyl, provinsiale woordvoerder van openbare vervolgings, gesê.
Cunningham het sy maatskappy, Webworths, wat net R10 miljoen werd was, in 2006 aan Fidentia Holdings verkoop vir ‘n prys van R160 miljoen.
Die R230 miljoen is bereken volgens die bepalings van die wet op die voorkoming van georganiseerde misdaad en het die feit dat Cunningham se bates in die afgelope ses jaar toegeneem het in ag geneem, het die koerant berig.
Fidentia is in 2007 onder kuratorskap geplaas. Sy base word daarvan beskuldig dat hulle R1,33 miljard verduister het uit ‘n trust wat geskep is om weduwees en weeskinders van oorlede mynwerkers by te staan.
– Volg Nuus24 op Twitter
- SAPA
