Staat help dié boere wat nie mas opkom
2010-10-31 09:26
Johannesburg - Sukkelende opkomende
boere wat plase en landbouprojekte – soos dié in die beleërde
Richtersveld – as deel van die grondherstelbeleid gekry het, gaan nou
geldelik uitgehelp word.
Die regering het sowat R900 miljoen
beskikbaar gestel om eens produktiewe plase oor Suid-Afrika heen én
landbouprojekte in die gewese tuislande wat erg vervalle is weer aan die
gang te kry.
In ’n verrassende wending het die departement van
grondhervorming en landelike ontwikkeling ook ingestem om in die
Richtersveld-gemeenskap in te gryp. ’n Tweespalt dreig om dié gemeenskap
uitmekaar te skeur.
Dié groep het die grootste grondeis tot nog toe in Suid-Afrika gewen, maar baklei nou onder mekaar oor die beheer daarvan.
Rapport
het vroeër berig hoe dié twiste én die gebrek aan vaardigheid die vyf
Richtersveld-plase só agteruit laat gaan het dat die koeie en volstruise
van honger gevrek het. Sitrusbome en lusern het verdroog en oesters in
die damme op die oesterplaas het gevrek.
Die plase was almal produktief toe dit in 2007 as deel van die grondeis oorgedra is.
Mthobeli Mxotwa, woordvoerder vir Gugile Nkwinti, minister van
grondhervorming en landelike ontwikkeling, het Dinsdag bevestig die
departement gaan in die Richtersveld ingryp.
“Ons gaan probeer om in belang van dié gemeenskap vrede te bewillig. Die proses het reeds begin.”
Volgens Mxotwa is die R900 miljoen deel van dié departement se herkapitalisasie-en-ontwikkelingsprogram.
“Dit moet plase en landbouprojekte wat weens ’n gebrek aan materiële en tegniese ondersteuning verval het, weer suksesvol maak.
“Die program word onmiddellik in werking gestel en diegene wat vir hulp in aanmerking kom, moet die naaste kantoor nader.”
Nkwinti
het Dinsdag by die Uniegebou gesê planne daarvoor is reeds gereed in
KwaZulu-Natal, die Oos-Kaap, Limpopo, Noordwes, die Noord-Kaap en
Vrystaat.
Intussen het die tweespalt oor die beheer van die Richtersveld-rykdom vererger.
Net
verlede Vrydag het die Richtersveld Communal Property Association met
nóg ’n hofgeding by die hooggeregshof in Kimberley begin. Dié aansoek
word op 22 November aangehoor.
- Rapport