'Staat gemelk vir ANC se fees'
2011-11-28 07:00
Pretoria – Die ANC melk staatsdepartemente deur hulle te R45 000 vra om by sy eeufeesviering volgende jaar ’n uitstalling te hê, terwyl die private sektor R20 000 per stalletjie betaal.
Dié tariewe is in ’n omsendbrief wat by haar kantoor afgelewer is, het Helen Zille, DA-leier en Wes-Kaapse premier, Saterdag in Pretoria gesê.
Zille en Lindiwe Mazibuko, die DA se parlementêre leier, was by die party se streekleiersverkiesing vir Noord-Gauteng. 236 afgevaardigdes het terselfdertyd die streek se jaarvergadering bygewoon.
Solly Msimanga is tot DA-streekvoorsitter verkies nadat mnr. Brandon Topham hom weens sakeverpligtinge nie weer verkiesbaar gestel het nie.
Zille het gesê die ANC misbruik die staat se hulpbronne.
Wanneer die DA 100 jaar oud word, sal daar ’n partytjie wees, maar belastingbetalers se geld sal beslis nie gebruik word nie.
Oor die kabinet se besluit om uitsprake van die konstitusionele hof te laat ontleed het Zille gesê as die Wetsontwerp op die Beskerming van Staatsinligting voor dié hof dien, hoop sy die hof sal by die Grondwet staan.
Sy hoop nie dié hof laat hom in onderwerping boelie nie. As die regbank nie onafhanklik van die regering is nie, sal ons demokrasie sterf, het sy gesê.
Die ANC is in ’n “erge krisis” en heeltemal verdeeld oor die toekoms. Die stryd teen apartheid het die ANC verenig gehou, maar nou is hy meer verdeeld as enige ander party, het sy gesê.
Dit is moontlik dat die DA die regering in Gauteng in die 2014-verkiesing kan oorneem. Hiervoor moet 25% van swart stemme verkry word, het sy gesê.
Die Nasionale Ontwikkelingsplan onder leiding van Trevor Manuel, beplanningsminister, sal die ANC uitmekaar skiet, het sy gesê. Die DA moet dié plan lewend hou.
Mazibuko het ook gesê dié plan bevat “DA-taal”. “Dis ’n baie goeie dokument, maar bedreig die politieke faksies in die ANC.”
Msimanga het gesê sy plan as nuwe streekvoorsitter is “om op die grond” te wees. “Jy moet elke dag aan gewone mense verduidelik hoe (belastingbetalers se) geld gemors word.”
Topham het gesê die DA in Noord-Gauteng het die afgelope 26 maande sy getal lede en takke meer as verdubbel.
Die nuwe leierskorps sal kwessies soos veilige strate, skoon administrasie, akkurate tariefbepaling vir munisipale dienste, doeltreffende busdienste, toegang tot basiese dienste en werkskepping bly dryf.
– Volg Nuus24 op Twitter