Staat betaal R84 m. vir leë gebou
2011-08-05 07:04
Kaapstad - Die regering het nóg ’n twyfelagtige huurooreenkoms teen miljoene rande gesluit vir ’n gebou wat al byna twee jaar in onbruik staan.
Die departement van openbare werke huur reeds sedert Januarie 2010 ’n gebou in Pretoria teen meer as R3,6 miljoen per maand namens die departement van justisie en grondwetlike ontwikkeling.
Die Burger het eksklusief verneem dat dié bedrag sowat sewe keer hoër is as die nettowins wat die vorige eienaar, AgriSA, met die verhuring van die gebou geïn het.
Van plan verander
Die departement van openbare werke het Agri SA boonop genader om die gebou te koop voordat dit in 2009 aan Phomella Property Investments (Edms.) Bpk. verkoop is, maar het later glo van plan verander.
Phomella is volgens sy webtuiste deel van die Billion Group-entiteit. Die maatskappy se bestuurshoof is die eiendomsmagnaat mnr. Sisa Ngebulana en sy direkteur is Vuyokazi Njongwe.
Die minister van justisie, Jeff Radebe, het in antwoord op ’n parlementêre vraag bevestig sy departement beoog om eers einde November by Schoemanstraat 255, Pretoria, in te trek.
Teen daardie tyd sal die regering reeds R84,2 miljoen aan huurgeld betaal het. Daarby het hy in April en Mei vanjaar ’n verdere R156 133,73 opgedok vir sekerheidsbeamptes om ’n “leë gebou” te beveilig.
Volgens Radebe kon hulle nog nie die perseel in gebruik neem nie, aangesien die “vereiste huurder-installasies” nog nie afgehandel is nie.
Debbie Schafer, DA-LP, beoog om die kwessie na die ouditeur-generaal te verwys omdat sy meen dit is ’n verkwisting van belastingbetalers se geld en ’n vrugtelose uitgawe.
“Die jongste onthulling herinner baie aan die onlangse sage rondom die polisie-huurooreenkoms ingevolge waarvan opgedrewe huurgeld deur die departement van openbare werke betaal is vir geboue wat nog opgeknap moes word,” het Schafer gesê.
“’n Ondersoek deur die openbare beskermer het toe bevind die minister van openbare werke, me. Gwen Mahlangu-Nkabinde, en die nasionale polisiehoof, komm. Bheki Cele, was skuldig aan onbehoorlike en onregmatige gedrag wat neerkom op wanadministrasie.”
Kopseer
Die geskiedkundige ou gebou in Pretoria wat in die jongste huurooreenkoms ter sprake is, is meer as 25 jaar gelede deur die Suid-Afrikaanse Landbou-unie gebou.
Volgens die president van Agri SA, Johannes Möller, was dit ’n groot probleem om die verhuring van die gebou van 28 verdiepings te bestuur en daarom is dit in 2006 in die mark gesit.
Die departement van justisie se woordvoerder, Tlali Tlali, is gistermiddag per telefoon, SMS en e-pos om kommentaar genader.
Tlali het egter aangedui dat hy die inligting sou moes naspoor en het teen druktyd nog nie kommentaar gelewer nie.
Volg Nuus24 op Twitter.
- Die Burger