Spoorlyn buite Heilbron lok diewe
2011-03-15 09:08
Heilbron - ’n Spoorlyn buite die dorp wat reeds jare in onbruik is, is ’n teelaarde vir misdaad en boere in dié Noord-Vrystaatse gemeenskap wag in vrees op die volgende plaasaanval.
’n Spoorlyn van Dover na die Heilbron-silo’s lok glo daagliks misdadigers wat stukke spoorstawe steel.
Boere vrees dat dié diewe enige tyd op plase kan toeslaan.
Voorts vererger gebrekkige selfoonontvangs dié vrees deurdat die gebruik van ’n selfoon in ’n noodgeval niks gaan help nie.
Een van dié boere, Herman van der Merwe (48) van die plaas Rietvlei, sê hy het reeds 14 waghonde op sy plaas.
“Die spoorlyn is ’n groot aantrekkingskrag. Dit lok ‘groot’ misdadigers. Hulle kom in die dag en lê in die veld terwyl hulle jou dophou. Die diewe slaan dan snags op die spoorlyne toe.”
’n Spoorlyn van 5 km lank loop langs sy plaas verby.
Van der Merwe, wat namens ander Heilbronse boere met Volksblad gepraat het, sê weens die spoorlyndiewe ly boere ook groot veeverliese.
Hy het beeste verloor waarvan die boude afgesny is.
“’n Ander boer in die omgewing het nou 30 beeste verloor.”
Die vermeende bende spoorlyndiewe slag van die beeste op hul misdaadrondes.
Van der Merwe sê hoewel hy nog nie ’n slagoffer van ’n plaasaanval was nie, is dit bloot net ’n geval van “eendag”.
“Ek sit in die veld en my vrou (Gladys) is alleen tuis. Enigiets kan gebeur.”
Hy vermoed vermeende plaasaanvallers het ongeveer 18 maande gelede ’n aanval op sy plaas beplan.
“Hier het mans met groot swart jasse gekom en my plaaswerkers allerhande vrae gevra.”
Van der Merwe sê die opvangs van die selfoonnetwerk is bitter swak.
Dit sny boere af van hulp sou ’n noodgeval ontstaan.
“Ons is uitgelewer aan misdaadelemente weens diensverskaffers se problematiese infrastruktuur.
“Voorts word telefoonlyne gesteel. Die boere hier is mismoedig.”
Mike Asefovitz, woordvoerder van Transnet se vragvervoer-afdeling, sê dié Heilbron-spoorlyn is deel van ’n lyn wat aan private gebruikers bewillig gaan word.
“Op die oomblik is daar egter (nog) ’n moratorium op die verkoop van dié lyne.”
Asefovitz erken diefstal en vandalisme is “reuse-uitdagings”.
Hy sê nietemin het Transnet reeds groot stappe begin doen ter bekamping van die probleem.
“Die maatskappy se opskerping van sy inligting-insameling en intelligensie-operasies is ’n 50%-verbetering. Bewaking van spoorlyne vanaf die grond en vanuit die lug is baie verbeter. Ons werk ook nou saam met die polisie se eenheid teen georganiseerde misdaad, die Valke, en misdaadintelligensie.”
Vodacom het nog nie op ’n navraag van Volksblad reageer nie.
In die mees onlangse plaasaanval in die groter Heilbron-gebied is Helgard Muller (66) van die plaas Mara buite Frankfort dood toe hy in die kop geskiet is met ’n wapen wat glo vroeër in ’n ander plaasaanval gebruik is. Die verdagtes word nie met spoorstaafdiefstal verbind nie.
- Volksblad