'Spooklede' by ANC in Oos-Kaap gevind

2012-11-16 08:21

Johannesburg – Die ANC in die Oos-Kaap het afgekom op "spooklede" in sy lidmaatskapboek, het Business Day Vrydag berig.

Oscar Mabuyane, provinsiale sekretaris, het aan die koerant gesê die party het vasgestel dat die databasisse van publieke en privaat instellings gebruik is om mense se inligting te kry om hulle in te skryf.

Sommige van die mense was nie eers bewus dat hulle lede van die ANC is nie.

Die skuldiges wat met die lidmaatskapvorms gepeuter het, het ook 'n aansluitingsfooi van R12 gedeponeer om 'n "goeie stand" te verseker.

Mabuyane het gesê dít is vasgestel toe die lidmaatskapregister voor 'n takvergadering nagegaan is om die opkomende nasionale verkiesingskonferensie in Mangaung te bespreek.

Die kwessie word ondersoek, het hy gesê.

– Volg Nuus24 op Twitter

- SAPA