Spoedvraat ry teen 199 km/h met kind in kar

2013-01-13 13:26

Johannesburg – ‘n Man is in hegtenis geneem toe hy teen 199 km/h in ‘n 120 km/h-sone op die N1 naby die Ou Johannesburg-pad in Pretoria gejaag het, het die Gautengse verkeerspolisie se spoedeenheid gesê.

Busaphi Nxumalo, ‘n woordvoerder, sê die 42-jarige man is Saterdag net voor 15:00 in sy Lexus vasgetrek.

Sy sê die bestuurder se 10-jarige seun was ook in die voertuig.

Volgens die woordvoerder kon die man nie ‘n rede vir die jaery verskaf nie. Hy het gesê hy het nie besef dat hy so vinnig ry nie.

Die man is in hegtenis geneem en na die Wierdabrug-polisiestasie geneem, waar hy van roekelose bestuur aangekla is.

Hy is op borgtog vrygelaat en sal Maandag in Pretoria se landdroshof verskyn.

Volg Nuus24 op Twitter  

- SAPA