Speurder vas vir korrupsie
2011-11-10 11:21
Kaapstad – 'n 40-jarige speurder van die Athlone-polisiekantoor is in hegtenis geneem vir korrupsie nadat hy glo 'n lid van die publiek uitgebuit het vir geld, het die polisie Donderdag gesê.
"Die polisieman het na bewering aan die klaer gesê hy sal slegs sy Opel Corsa-sedan, wat in Stikland geskut is, kry as hy hom 'n bedrag geld betaal," het ao. November Filander gesê.
Woensdag omstreeks 14:45 het die polisie die man in 'n lokval vasgetrek toe hy die geld van die klaer ontvang en die voertuig oorhandig het.
"Hy is by die Athlone-polisiekantoor aangehou en het op aanklag van korrupsie en uitbuiting in die Athlone-landdroshof verskyn," het Filander gesê.
"Hy is op borgtog van R500 vrygelaat en die saak is vir verdere ondersoek tot 18 Januarie 2012 uitgestel."
– Volg Nuus24 op Twitter
- SAPA