Speurder op vermiste Wimpy-bestuurder se spoor
2011-10-20 09:03
Bloemfontein – ’n Private speurder van Bloemfontein is warm op die spoor van die vermiste Wimpy-bestuurder van die stad, Steven Williamson (30).
Dié getroude Bloemfonteiner is reeds byna twee weke soek.
Sedert sy verwyning is sy foto en beskrywing oor die land heen versprei in die hoop om hom veilig op te spoor.
Leon Rossouw, bekende selfoonspeurder, het Woensdag teen druktyd gesê waardevolle inligting kom sedert sy verdwyning na vore en alle leidrade word opgevolg.
Williamson het verdwyn nadat hy aan ’n gholfdag van die Kanker-vereniging van Suid-Afrika (Kansa) in die Tempe-weermagbasis deelgeneem het.
Hy is die oggend van Saterdag 8 Oktober die laaste keer in die stad gesien nadat hy die vorige nag by verskeie kuierplekke was.
’n Klag van diefstal teen Williamson is deur Daan van der Vyver, eienaar van die Wimpy-restaurant op Prellerplein, ingedien nadat geld uit die restaurant se brandkluis geneem is, maar weer later teruggetrek.
Van der Vyver het gesê hy wil Williamson nie vervolg nie.
Hy wil net hê hy moet veilig terugkom.
Williamson se vrou, Béola, bid elke dag haar man moet terugkeer.
’n Facebook-groep, Search for Steven Williamson, het Woensdagaand 2 185 lede gehad.
Dit het talle boodskappe van ondersteuning en gebede.
Daar word ook voorgestel dat daar Saterdag ’n bid-byeenkoms met kerse in die stad moet wees vir sy veilige terugkeer.
Sy vrou het geskryf: “Dis moeilik om dag in en dag uit net die hele tyd positief te bly. En dan het ek hierdie intense verlange! Voel of ek mal wil word ... En ek bekommer my dooooooood oor hom!”
Rossouw het mense gevra om steeds op die uitkyk te wees vir Williamson se motor.
Enigiemand met inligting kan hom by 083-410-0900 bel of ’n e-pos stuur aan info@detectives.co.za.
Volg Nuus24 op Twitter
- Volksblad