Spesiale reëlings getref om werkstaking te troef
2010-04-12 10:00
Marelize Barnard
Kaapstad en Johannesburg - Spesiale reëlings vir vullisverwydering geld van vandag vir die verloop van die staking deur lede van die SA Munisipale Werkersunie (Samwu) wat vir die Kaapstadse munisipaliteit werk.
Optogte word vir die eerste drie dae van die staking beplan, luidens ’n persverklaring deur mnr. André Adams, Wes-Kaapse voorsitter van Samwu.
Nooddienste sal nie deur die staking geraak word nie.
Die landwye staking van meer as 60 000 munisipale werkers, onder wie ook verkeerslui, gaan voort nadat ’n aansoek om ’n dringende hofbevel deur die Suid-Afrikaanse Vereniging vir Plaaslike Owerhede (Salga) om die staking verbied te kry, in die naweek misluk het.
Volgens Siphiwo Ndunyana, provinsiale sekretaris van Samwu, het die regter besluit Salga se aansoek om ’n interdik is nie dringend genoeg nie.
Salga se uitvoerende hoof, Xolile George, sê dit beteken nie dat die hof daaroor besluit het of die beplande staking wettig of onwettig is nie. “Indien werkers wel staak, is dit op eie risiko. As ’n hof wel later sou besluit dat die staking onwettig en onbeskermd is, kan werknemers ingevolge die wet geskors word,” het George aan Sapa gesê.
Samwu, wat beweer hy het 130 000 lede landswyd, het in ’n verklaring gesê die unie het geduld verloor met die “vertragings en die algemene onverantwoordelike houding” van Salga se onderhandelings met Samwu. Hy is ontevrede omdat die munisipale posevalueringsproses sedert 2003 sloer, markverwante lone nie vir al sy lede geld nie en daar ’n gebrek aan regsverteenwoordiging vir sy lede in tugverhore is.
Optogte word vir vandag in Kaapstad (na die Burgersentrum), Worcester, Paarl, Hermanus, Caledon, Saldanha, Piketberg, Vredendal, Beaufort-Wes, Oudtshoorn en Knysna beplan. Môre word optogte in Kaap Agulhas, Ceres, Ashton, Malmesbury, Clanwilliam, George, Mosselbaai en Plettenbergbaai beplan, en Woensdag in Swellendam, Stellenbosch, Ladysmith en Riversdal.
Die stakers is van plan om op die dae waarvoor daar nie optogte beplan is nie, buite die administrasiegeboue van die onderskeie munisipaliteite te betoog.
In Kaapstad het die stadsraad inwoners gevra om hul vullisdromme volgens die gewone rooster uit te plaas. Indien die dromme nie op die geskeduleerde dag leeggemaak word nie, moet dit buite gelaat word sodat die werkende munisipale werkers dit later kan verwyder wanneer agterstallige werk ingehaal is.
Indien inwoners self vullis wil wegneem, kan die inbelsentrum by 086 010 3089 gekontak word vir inligting oor die naaste stortingsterrein.
Luidens ’n verklaring deur die Kaapse stadsraad kan skoonmaakdienste soos straatvee, die leegmaak van openbare vullisblikke asook die verwydering van afval wat onwettig gestrooi is, ook geraak word. Inwoners is gevra om geduldig te wees.
Toegang tot die Burgersentrum in die middestad gaan om veiligheidsredes beperk word tot mense wat byvoorbeeld hul diensterekeninge en motorlisensies wil betaal.
Lede van die publiek kan die metropolisie se radiokamer by 00215961999 bel indien stakende werkers hulle wangedra.
- Die Burger