Speletjie loop lelik skeef
2010-03-22 07:08
Marelize Potgieter, Die Burger
Kaapstad - ’n Speletjie tussen twee polisiebeamptes met ’n Z88-pistool het gister in die Seepunt-polisiekantoor byna die lewe van ’n studentekonstabel geëis.
Só het Moses Dlamini, woordvoerder van die Onafhanklike Klagtedirektoraat (OKD), Sondag gesê nadat aanvanklik gesê is die beampte is geskiet terwyl hy en ’n kollega ’n nuwe veiligheidsmeganisme getoets het.
Die 24-jarige polisieman, wie se naam nie bekend gemaak is nie, is om 08:05 deur die 9 mm-koeël in die kop getref toe hy en sy kollega aan mekaar probeer demonstreer het dat ’n vuurwapen steeds afgeneem kon word al is dit van ’n nuwe veiligheidsmeganisme voorsien.
Die gewonde is inderhaas na ’n Kaapse hospitaal gebring, waar hy ’n noodoperasie ondergaan het. Hy is in ’n koma en sy toestand is kritiek.
Die meganisme bestaan onder meer uit ’n koord wat aan die vuurwapen en sy holster vas is, maar wat die beampte steeds toelaat om sy wapen te hanteer.
Die polisieman wat die skoot afgetrek het, is ’n 29-jarige konstabel verbonde aan die Seepuntse polisiekantoor.
Volgens Dlamini het die 29-jarige polisieman voor die voorval die magasyn uit die pistool gehaal, maar klaarblyklik nie daarmee rekening gehou dat daar steeds ’n patroon in die wapen was nie.
Die voorval word deur die polisie in samewerking met die Onafhanklike Klagtedirektoraat (OKD) ondersoek. Indien die konstabel sterf, sal dit ’n onafhanklike ondersoek van die OKD word.
Kapt. Frederick Van Wyk, provinsiale polisiewoordvoerder, het gesê die 29-jarige konstabel is na die voorval ondervra en die vuurwapen het ballistiese toetse ondergaan.
Hy is nie in hegtenis geneem nie, maar ’n klag van poging tot moord word ondersoek.
Polisielede wat in die vertrek was toe die voorval plaasgevind het, het berading ontvang.
Die polisiekantoor was ná die voorval vir die publiek gesluit en ’n tydelike kontakpunt is buite die perseel opgestel.
Volgens dr. Johan Burger, wapenkenner en senior navorser van die Instituut vir Sekerheidstudies, bevind polisiebeamptes hulle dikwels in baie moeilike situasies waar hulle binne sekondes moet reageer.
Daarom hou die meeste polisiebeamptes gewoonlik hul vuurwapens gespan, maar met die veiligheidsknip aan.
Dit is baie onwaarskynlik dat die wapen as gevolg van ’n meganiese fout vanself sou afgaan.
Oor die algemeen word polisiebeamptes in Suid-Afrika baie goed in wapenveiligheid opgelei.
Adv. Lennit Max, provinsiale minister van gemeenskapsveiligheid, het gesê die voorval is betreurenswaardig.
“Wapenveiligheid is ’n baie hoë prioriteit vir die polisie. Hantering- en beveiligingsopleiding word gereeld met polisielede gedoen.”
’n Deeglike ondersoek na die voorval sal gedoen word om vas te stel wat presies gebeur het.
- Die Burger