Sondagverkragter weer in die hof
2012-02-01 10:11
Johannesburg – Die man wat daarvan aangekla word dat hy die skoolmeisie Louise de Waal van Roodepoort vermoor het, sal Woensdag in die Krugersdorp-landdroshof verskyn.
Johannes Jacobus Steyn het Kersfees in die tronk deurgebring nadat sy saak in Desember uitgestel is.
Landdros Keith Page het vereis dat die toksikologie- en DNS-verslag teen sy volgende hofverskyning voltooi moet wees of beskikbaar gestel moet word.
Steyn staar 13 aanklagte van verkragting, 10 van ontvoering, een van moord en ses van seksuele aanranding in die gesig.
Hy het De Waal glo in Oktober in Roodepoort, wes van Johannesburg, kort voor haar 17de verjaardag ontvoer.
‘n Verkoolde lyk, wat vermoedelik die van De Waal was, is later dieselfde dag op ‘n plaas in Magaliesburg gevind.
Steyn het homself die volgende dag by die Margate-polisiestasie in KwaZulu-Natal oorgegee.
Die polisie het gesê Steyn het erken dat hy die “Sondagverkragter” is, maar hy het nie skuld erken op die moord op De Waal nie.
Hy het glo sedert 2008 verskeie jong meisies in Gauteng en in die Noordwes verkrag, meestal op Sondae.
Twee sake van ontvoering wat Steyn glo in Rustenburg en Potchefstroom gepleeg het sal ook in die Krugersdorp-landdroshof aangehoor word.
Die staat het aansoek gedoen dat al die aanklagte teen hom gesentraliseer moet word.
– Volg Nuus24 op Twitter
- SAPA