Sondagverkragter skuldig aan 33 aanklagte

2012-09-18 15:27

Johannesburg – Die dood van Lazanne Farmer, die meisie van Pretoria wat deur die sogenaamde Sondagverkragter ontvoer is, kan toegeskryf word aan strafbare manslag, en nié moord soos die staat aangevoer het nie, het regter Sita Kolbe Dinsdag in 'n sitting van die Gautengse hooggeregshof in Alberton bevind.

Regter Kolbe het gesê die staat het bo redelike twyfel bewys dat Johannes Jacobus Steyn skuldig was aan die ontvoering en strafbare manslag van Farmer.

“Daar was getuienis dat geen mediese hulp haar sou kon red nie,” het Kolbe gesê.

Farmer se suster het begin huil toe die uitspraak gelewer is.

Farmer (14) is in September 2010 deur ‘n man in ‘n bakkie ontvoer. Sy is dood nadat sy van die bakkie afgespring het in ‘n poging om te ontsnap.

Sapa berig Steyn is deur die loop van die sitting aan altesaam 33 aanklagte skuldig bevind.

Kolbe het vroeër Dinsdag ook gesê die staat het bo redelike twyfel bewys dat Steyn die tiener Louise de Waal ontvoer en vermoor het.

Hy is egter vrygespreek op aanklag dat hy De Waal verkrag het.

– Volg Nuus24 op Twitter

- SAPA