Solidariteit: ‘Skiet die Boer’ dalk uitlokking tot moord
2010-05-05 14:00
Kaapstad - Die sing van “Dubul’ ibhunu” (Skiet die Boer) deur die leier van die ANC-jeugliga, Julius Malema, kan ingevolge die Strafproseswet as uitlokking tot moord beskou word, het die vakbond Solidariteit se Navorsingsinstituut (SNI) Woensdag gesê.
Volgens Johan Kruger, hoof van die SNI, is daar sterk gronde vir die argument dat Malema se optrede op uitlokking tot moord neerkom.
“Kort ná Malema die lied in die openbaar gesing het, het verskeie organisasies regsprosesse aan die gang gesit om te verhoed dat hy dit weer sing. AfriForum het hom selfs tot die hooggeregshof gewend en daarin geslaag om 'n interdik te kry wat Malema verbied om die lied te sing. Daarbenewens is daar ook nou 'n klag van haatspraak teen dié leier gelê,” sê Kruger volgens 'n verklaring op Solidariteit se webwerf gesê.
Kruger meen dat Malema hom moontlik ook skuldig maak aan 'n verdere misdaad, naamlik uitlokking tot moord, deur die lied te sing.
In 'n navorsingsdokument wat Kruger oor die moontlike regsimplikasies van Malema se sing van die lied saamgestel het, beklemtoon hy onder meer dat die bekende strafreggeleerde professor CR Snyman aan die SNI bevestig het dat hierdie optrede van Malema inderdaad neerkom op die pleeg van die misdaad uitlokking tot moord.
Die SNI hou vol dat, selfs al word daar uiteindelik geen moord gepleeg nie, iemand steeds aan uitlokking tot moord skuldig bevind kan word.
As daar egter wel 'n moord gepleeg word, kom die kwessie van medepligtigheid aan moord ter sprake.
“Hoewel Malema se sing van die lied nie op 'n enkele individu gemik is nie, beteken dit ook nie dat hy nie van uitlokking tot moord aangekla kan word nie,” verduidelik Kruger. “Die appèlhof in Bloemfontein het in 1960 'n persoon skuldig bevind aan uitlokking om 'n misdaad te pleeg ten spyte daarvan dat die uitlokkende woorde nie op 'n spesifieke persoon gerig was nie. In Malema se geval kan dieselfde argument aangevoer word.”
Kruger benadruk daarbenewens dat as 'n klag van uitlokking tot moord teen Malema gelê word en die staat besluit om hom nie te vervolg nie, daar steeds die geleentheid vir privaatvervolging bestaan.
-Nuus24
-Volg Nuus24 op Twitter.