Soldate se verhogings 'ten koste van aankope'
2009-12-18 07:58
Rajaa Azzakani
Kaapstad - Soldate in die Suid-Afrikaanse Nasionale Weermag gaan salarisverhogings van tot 98% kry, maar dit sal ten koste van die regering se langtermynprogram vir aankope wees.
Dr. Lindiwe Sisulu, minister van verdediging en militêre veterane, het Donderdag dié aankondiging by die militêre basis Youngsfield in Wynberg gedoen.
Dit sal die regering van nou tot April aanstaande jaar R621 miljoen uit die sak jaag.
Boonop is ’n bonus van R1 688 Woensdag betaal aan alle soldate wat die weermag se gedragskode nakom.
Soldate wat hulle tydens betogings vroeër vanjaar by die Uniegebou in Pretoria aan wangedrag skuldig gemaak het, het nie vir dié bonus in aanmerking gekom nie.
Sisulu het aan soldate gesê die maandelikse salaris van soldate in hul eerste jaar van opleiding sal van R2 643 tot R4 318 verhoog word.
Soldate in hul tweede jaar van opleiding, wat tot dusver dieselfde as nuwe rekrute verdien het, sal nou R5 343 per maand kry.
Dié verhogings is van 1 Desember af van krag en soldate sal teen volgende Woensdag alle uitstaande geld ontvang.
’n Weerman se maandelikse salaris gaan van R5 286 tot R7 871 styg, dié van ’n onderkorporaal van R6 149 tot R8 519, terwyl ’n korporaal voortaan R9 222 verdien, sowat R2 000 meer as voorheen.
Hoewel dié besluit nie voor die kabinet vir goedkeuring gedien het nie, het pres. Jacob Zuma op Versoeningsdag aangekondig soldate gaan ’n stewige salarisverhoging kry.
Dié verhogings is aanvanklik beplan vir die mediumtermyn-begroting wat in April aanstaande jaar in werking tree, maar die regering wou die kwessie vroeër aanspreek.
Daar is besluit om voorlopig geld te “leen” by projekte wat nie onmiddellik aandag verg nie.
- Die Burger