Sokkertoeriste sal R14 miljard spandeer
2009-12-06 13:24
Johannesburg - Buitelandse besoekers aan die 2010 Wêreldbeker-sokkertoernooi sal na verwagting sowat R14,3 miljard tot die Suid-Afrikaanse ekonomie bydrae.
Volgens Gillian Saunders, 'n toerismekenner by Grant Thornton, sal die land meer as 2,2 miljoen ekstra besoekers vanaf 2008 tot 2015 verwelkom te danke aan die sokkertoernooi.
Grant Thornton, 'n finansiële konsultasie maatskappy, het Vrydag sy jongste vooruitskatting vir die ekonomiese impak van die toernooi bekend gemaak.
Saunders verwag dat die sokkerkompetisie R55,7 miljard tot die bruto binnelandse produk sal voeg en 415 400 werke sal skep.
Die bedrag sluit regeringsbesteding aan infrastruktuur sowel as borgskappe en advertensieregte in.
Die gemiddelde sokkertoeris spandeer 25% van sy geld aan verblyf, 18% aan vervoer, 15% aan kos en dieselfde persentasie aan inkopies. Dié vakansiegangers bestee ook gemiddeld 12% van hul begroting op vermaak en 15% op ander items.
- Sake24.com