Sokkerster in R10 m troubreuk-drama
2009-08-30 11:00
Johannesburg – Die Bafana Bafana middelveld-ster Steven Pienaar word vir troubreuk deur die ma van sy kind vir R10,8 miljoen gedagvaar.
Die paartjie se baba is 14 maande oud.
Die 27-jarige Everton United-ster word deur sy voormalige minnaares Danielle Steeneveld (22) hof toe gesleep omdat hy glo trou aan haar beloof het.
In hofdokumente wat vroeër vandeesmaand by die hooggeregshof in Johannesburg ingedien is, voer Steeneveld aan dat Pienaar “malverlief op haar geraak het” en haar belowe het dat hy die res van sy lewe saam met haar wil deurbring.
Die verhouding was egter twee jaar later op die rotse.
Prokureurs wat namens Steeneveld optree, het gesê hul kliënt is nie bereid om kommentaar te lewer nie.
Sy sê egter in hofstukke dat sy haar lewe in Suid-Afrika prysgegee het om ’n toekoms met die internasionale sokkerster te begin, berig die Sunday Times.
Steeneveld van Roodepoort in Johannesburg eis R500 000 vir troubreuk, R3,8 miljoen vir naamskending, haar selfbeeld en reputasie nadat sy glo op sy aandrang voor die huwelik swanger geraak het en R6,5 miljoen vir toekomstige verlies.
Pienaar het twee weke gelede ’n dagvaarding gekry.
Nie Pienaar of sy prokureur kon vir kommentaar bereik word nie.