Sokkerspeler jaag teen 189 km/h
2011-07-10 19:11
Johannesburg – Vyftien mense, insluitende ‘n professionele sokkerspeler, is oor die naweek in Johannesburg in hegtenis geneem vir dronkbestuur en spoedoortredings, het die Johannesburgse metropolisie gesê.
Volgens Wayne Minnaar, woordvoerder, is 12 mense Saterdagaand en Sondagoggend in hegtenis geneem vir spoedoortredings.
“Die hoogste spoed wat opgeteken was, was ‘n silver Audi Q7 wat laat Saterdagaand op die N3 suid naby Alexandra teen 208 km/h gejaag het.”
Hy sê ‘n professionele sokkerspeler het omstreeks 02:00 in sy BMW teen 189km/h gejaag.
‘n Dronkbestuurder het reg van voor teen ‘n metropolisie-motor gebots by die Buccleuch-wisselaar.
“Die beamptes is gelukkig nie beseer nie.”
Metropolisiebeamptes het ook twee vermeende kapers op die hoek van Vasco da Gamastraat en Vierde Laan naby Alexandra in hegtenis geneem.
Die polisie het ‘n wenk ontvang en die twee mans in hegtenis geneem. Hulle is in besit van ‘n ongelisensieërde vuurwapen en ammunisie betrap.
“Al die verdagtes sal vandeesweek in verskeie howe verskyn,” het Minnaar gesê.
- Volg Nuus24 op Twitter
- SAPA