Soektog duur voort na man wat vrou laat verkrag
2012-01-05 13:00
Johannesburg – Die polisie in Limpopo is vol vertroue dat die 51-jarige man wat gesoek word vir die moord op sy stiefseun en die aanval op sy vervreemde vrou in hegtenis geneem sal word.
“Ons volg sterk wenke... ons het ouens in die veld wat besig is om hom op te spoor. Ons is vol vertroue dat hy in hegtenis geneem sal word. Ek hoop vandag nog,” het woordvoerder brig. Hangwani Mulaudzi Donderdag gesê.
Die man, wie se identiteitsdokument dui dat hy in Namibië gebore is, het drie mans, wat na bewering van sy werkers is, glo met gewere aangehou en gedwing om sy vervreemde vrou te verkrag.
Hulle het haar ook Dinsdag in sy huis in Modimolle aangerand en gesny.
Hy het gevolglik sy 19-jarige stiefseun na sy huis gelok en hom doodgeskiet toe hy daar aangekom het.
Die man het in sy wit Toyota Fortuner met die registrasienommer DCS 392 FS gevlug.
Die drie werkers het weggehardloop en dit was nie bekend waar hulle was nie.
Mulaudzi het gesê dit was nog nie bekend of die mans vir die man gewerk het voor die aanval nie en of hy hulle moontlik in die dorp opgelaai het en tydelike werk vir hulle aangebied het nie.
– Volg Nuus24 op Twitter
- SAPA