Só werk De Zille se pakt
2010-08-16 06:36
Die Burger
Kempton Park - Patricia de Lille se Onafhanklike Demokrate (OD) sal ná slegs elf jaar van sy bestaan heeltemal deur die Demokratiese Alliansie (DA) ingesluk word.
Dié “troue” tussen De Lille en Helen Zille, Wes-Kaapse premier en DA-leier, se onderskeie partye is gister in Kempton Park aan die Oos-Rand aangekondig.
“Die troue is vir goed,” het De Lille Sondag gesê.
Later het dié twee leiers De Lille se nuwe DA-lidmaatskapkaart gewys en mekaar herhaaldelik drukkies gegee en hande geskud.
Volgens hulle is dit die eerste stap in ’n beweging om alle opposisiepartye “wat dieselfde dink” saam te snoer as een groot alternatief teen die ANC.
Die OD is, soos verkiesingsuitslae toon, ’n veel swakker party as wat dit in 2004 was.
Die party kon verlede jaar net 162 915 mense of 0,92% van die kiesers oorreed om vir hom te stem, terwyl dit in 2004 altesaam 269 765 of 1,73% stemme verower het.
Zille meen daar moet na die geheel gekyk word en dat die samesmelting tussen die OD en die DA as die eerste stap na ’n alternatiewe regering beskou word.
“Patricia was lank my politieke opponent, maar soos ons in koalisieregerings op plaaslike vlak saamgewerk het, het ons besef ons deel dieselfde beginsels,” het Zille gesê.
De Lille meen onderhandelings met Cope en die UDM sal voortgaan om hulle ook by die nuwe “alternatief” te voeg.
Sy het benadruk sy is geen posisie in die DA of ’n LUR-pos in die Wes-Kaapse regering belowe nie.
“Sy wou geen pos binne die DA gehad het nie. Sy sluit by die party aan as ’n gewone lid,” het Zille beklemtoon.
De Lille sal soos al die ander parlements- en wetgewerlede van die OD tot en met 2014 dubbele lidmaatskap van albei partye hê.
OD-raadslede sal tydens volgende jaar se plaaslike regeringsverkiesing onder die vaandel van die DA deelneem en daarna net gewoon lede van die DA wees.
Intussen sal ’n sekere aantal OD-lede in elk van die DA se nasionale bestuurskomitee, die federale uitvoerende gesag en die federale raad asook provinsiale rade dien.
Volg Nuus24 op Twitter
- Die Burger