Só ry die ANC se gaste na Rosestad
2012-01-06 08:33
Bloemfontein – Die Bloutrein ry Saterdag dié stad binne met belangrike gaste vir die ANC se eeufeesvieringe.
Onder die hooggeplaastes wat met dié luukse trein van Pretoria-stasie af aankom, is dr. Kenneth Kaunda, voormalige staatshoof van Zambië, het Herbert Themba Masheula, woordvoerder van die Bloutrein, Donderdag bevestig.
Wie die ander belangrike ANC-gaste op die vyfsterhotel op wiele is, wou hy nie sê nie.
“Al wat ek wel kan sê, is dat die passasierslys vooraanstaande vryheidsvegters van verskeie wêreldlande insluit.”
Die Bloutrein word tans deur Transnet besit en is twee jaar gelede tydens die Wêreldreisigerstoekennings in Sandton as Afrika se beste luukse trein aangewys.
Asemrowende ritte word moontlik gemaak deur twee verskillende Bloutreine, waarvan die eerste trein oor 37 suites beskik wat in totaal 74 gaste kan huisves. Die tweede trein bestaan uit 29 suites en kan 58 gaste huisves.
Elke suite beskik oor stort- en of badgeriewe.
Daar is twee luukse trokke per trein wat uit twee luukse suites, elk met private badkamergeriewe, bestaan.
Die oorblywende nege trokke per trein bestaan uit vier suites elk.
Albei die treine is toegerus met luukse sitkamers en eetkamers.
Masheula het gesê die Bloutrein vertrek vandag om 11:00 van die Pretoria-stasie en sal na verwagting omstreeks 19:00 in Bloemfontein aankom.
Volg Nuus24 op Twitter
- Die Burger