Só kan die tolpaaie jou sak ruk
2011-11-08 07:05
Kaapstad - Tolgeld kan Kaapse pendelaars tussen R400 en R800 per maand uit die sak jaag as die Wynland-tolpadprojek op die N1 en N2 voortgaan.
Dié slegte nuus vir padgebruikers word in detail uitgespel in verslae en dokumente wat ingedien is as deel van die Stad Kaapstad se hofaansoek om die Nasionale Padagentskap (Sanral) se tolpadplan in sy huidige vorm te stuit.
Sanral het tot vandag om aan te dui of hy die aansoek gaan teenstaan.
In ’n studie wat in 2008 vir Sanral gedoen is, word geskat die tolgeld vir motoriste op die N2 vir 40 ritte per maand tussen die Baden Powell-afrit en Kaapstad sal tussen R400 en R480 per maand kos en dieselfde getal ritte van die Somerset-Wes-tolhek na Kaapstad tussen R560 en R800 per maand.
Pendelaars
Taxi-pendelaars wat tussen Kraaifontein en Kaapstad op die N1 pendel, sal R91 per maand meer moet opdok, en taxi-pendelaars van Khayelitsha na Somerset-Wes R183 per maand.
Die uiteindelike tolgeld kan drasties verskil van hierdie ramings omdat die syfers wat in die studie gebruik is van 2002 dateer.
Vervoerekonome wat namens Kaapstad ’n studie gedoen het, het gevind die konsessiehouers wat die tolpaaie bedryf sal tussen 4,5 en 9,8 keer meer geld uit die heffings maak as wat die bouwerk, instandhouding en bestuur van die paaie sal kos.
Ekonome waarsku die impak van die tolpaaie sal veel wyer strek as gewone pendelary, want dit sal die vervoer van alle goedere na en van Kaapstad verhoog.
Op die lange duur sal inwoners van Kaapstad ook die impak op hul eiendomsbelasting voel.
Die stadsraad skat hy sal tussen R270 miljoen en R500 miljoen meer aan die bou en instandhouding van sy eie paaie moet bestee weens die toename in verkeer omdat pendelaars die tolpaaie sal vermy.
In nog ’n studie in die hofstukke word geraam dat die tolpaaie druiweboere ’n addisionele R4 miljoen tot R5 miljoen per jaar kan kos. Dit kan die prys van ’n karton druiwe met tot 30c opstoot.
Protea Parkways Consortium, die voorkeurbieër om die tolpaaie te bestuur, is ook die konsortium wat Sanral meer as 13 jaar gelede genader het met dié tolpadplan.
Die Stad Kaapstad sê in sy hofaansoek Sanral en die nasionale omgewingsowerheid weier al langer as ’n dekade om gehoor te gee aan sy besware teen die twee tolpaaie.
Boonop het Sanral belangrike dokumente oor die projek uit die openbare oog gehou.
Die stadsraad voer ook aan dat die projek se aanvanklike ekonomiese impakstudie die verwagte verkeersvolume op die paaie oorskat het.
Hofdokumente toon ook dat die nasionale owerhede tydens die jare lange beplanningsproses deurgaans geen ag geslaan het op besware van Kaapstad en die Wes-Kaapse provinsiale regering oor die impak wat die tolpad op veral arm inwoners sou hê nie.
Briewe
In die hofaansoek haal Kaapstad se uitvoerende direkteur van vervoer, Madecy Mazaza, agt briewe en voorleggings van die raad aan Sanral en die nasionale departement van omgewingsake aan waarin herhaaldelik gevra is vir ’n behoorlike ondersoek na die ekonomiese uitwerking van die tolpaaie, veral wat die armes betref.
Die stadsraad voer aan Sanral het geweier om die verslag waarop die nasionale vervoerminister sy finale besluit oor die tolpaaie sou grond aan die stad of publiek beskikbaar te stel.
Geen alternatiewe maniere om vir opgraderings aan die paaie te betaal is ooit oorweeg nie.
Sanral en Protea Parkways het nie gereageer op versoeke vir kommentaar nie.
In nog ’n studie in die hofstukke word geraam dat die tolpaaie druiweboere ’n bykomende R4miljoen tot R5mijloen per jaar kan kos. Dit kan die prys van ’n karton druiwe met tot 30c opstoot.
– Volg Nuus24 op Twitter.
- Die Burger