Smeulende dansers laat teater brand
2011-10-29 09:04
Welkom – Miljoene rande se skade is hier in die Ernest Oppenheimer-teater aangerig toe ’n vuurwarm vertoning van ’n vlamdanser tydens ’n erotiese dansvertoning tot ’n brand op die verhoog gelei het.
Wat presies die brand veroorsaak het, is deel van die ondersoek wat nou deur die brandweer en die Matjhabeng-munisipaliteit gedoen word. Die skade wat aangerig is, is van so ’n groot omvang dat die teater ten minste tot die einde van die jaar gesluit sal wees.
“Ek het op die verhoog gesien hoe jare se harde werk in vlamme opgaan. Die een oomblik was die vlamme sowat 1m hoog en binne sekondes het dit tot teen die teater se dak (sowat drie verdiepings hoog) opgeskiet,” sê Dulcie Harris, wat sedert 1996 die teaterbestuurder van die Ernst Oppenheimer is.
Sy sê dit is hoofsaaklik waterskade en al die elektriese bedrading is ook beskadig.
Geen ligte kan op die verhoog aangeskakel word nie, van die meeste van die gordyne is daar net as oor en die houtvloer is beskadig.
“Gelukkig is die personeel van die teater baie goed opgelei en elkeen het geweet wat om te doen. Die hoofgordyn is onmiddellik laat sak en dit het die brand tot die verhoog beperk. Mnre. Absalon Mashigo, tegniese verhoogbestuurder, en Dirk Pretorius, een van die plekaanwysers, was die helde van die aand.
“Ons besigste tyd lê nou voor. Die teater is vol bespreek tot die einde van die jaar.”
Harris doen alles in haar vermoë om mense wat reeds bespreek het, elders reg te laat kom. Die Suid-Afrikaanse liggaamsboukampioenskap wat die naweek in die teater gehou sou word, is na die Ferdi Meyersaal geskuif.
Harris bevestig dat die vertoning wat Donderdagaand deur twee Gautengse dansgroepe, Odyssey International en Explicit gehou is, slegs vir vroue was en eksplisiet van aard is. Die vertoning het ’n ouderdomsbeperking van 16 jaar gehad.
Sam Makubu, waarnemende munisipale bestuurder van Matjhabeng, sê die munisipaliteit sal alles in sy vermoë doen om die teater so gou as moontlik weer aan die gang te kry. Hy het bevestig dat die munisipaliteit versekering teen brande het.
Riaan van Wyk, eienaar van Odyssey, sê hy is baie emosioneel en hartseer oor wat gebeur het.
Hy sê die 11 die dansers wat opgetree het, kan nie verstaan wat gebeur het nie.
“Van die dansers het self probeer om die vlamme te blus. Almal is geskok. Dit is sleg. Die teaterpersoneel het egter die situasie baie goed gehanteer en die toeskouers het baie vinnig en ordelik die teater verlaat.”
’n Vrou wat die vertoning bygewoon het en anoniem wil bly, sê dit was ’n vertoning van hoogstaande gehalte en die skraps geklede dansers is baie professioneel.
“Die vertoning het kort ná 20:00 begin. Terwyl die vlamdanser besig was, het ek iets geruik, maar ek kon nie sien wat aangaan nie. Van die vroue het begin opstaan en die volgende oomblik het iemand ons gevra om die teater te verlaat. Ek kon die vlamme op die verhoog sien.”
Sy sê niemand in die gehoor was histeries nie.
– Volg Nuus24 op Twitter.
- Volksblad