Sluipmoordenaar weer in hof
2012-01-11 08:01
Kaapstad – Die borgtogaansoek van Dobrasov Gavric, ’n veroordeelde Serwiese sluipmoordenaar, word Woensdag in die Kaapstad-landdroshof voortgesit.
Gavric (38) word aangekla van die vervalsing van identiteitsdokumente en paspoorte.
Die Burger het voorheen berig dat hy glo sedert 2007 in Suid-Afrika is nadat hy uit Serwië gevlug het voordat hy gevonnis is.
Hy word in Serwië gesoek vir die moord op die rampokker en oorlogsmisdadiger Zeljko Raznatovic en twee ander mense.
Gavric is in sy afwesigheid tot 35 jaar tronkstraf gevonnis.
Sy ware identiteit het ná die sluipmoord verlede jaar op Cyril Beeka (49), ’n bekende figuur in die plaaslike onderwêreld, bekend geword. Gavric het onder die naam Sasa Kowasewic in Suid-Afrika bekend gestaan.
Dit is in verband met paspoorte en identiteitsdokumente wat in die naam Kowasewic uitgemaak is dat hy in die Kaapstad-landdroshof aangekla word.
Hy het homself onlangs aan die polisie oorgegee.
Die ondersoekbeampte in die plaaslike saak, kapt. Paul Hendricks, het gister die getuiebank ingeneem.
Sy kruisondervraging deur adv. Pete Mihalik, vir Gavric, sal Woensdagoggend voortgaan.
Volg Nuus24 op Twitter
- Die Burger