Slegs Oscar weet wat het gebeur, sê pa

2013-02-14 11:31

Kaapstad – Slegs Oscar Pistorius self kan 'n verklaring gee oor wat presies Donderdag in die vroeë oggendure by sy huis gebeur het, het die ster-atleet se pa, Henke Pistorius, gesê.

'n Emosionele Pistorius sr. het aan RSG gesê die gebeure is tragies, maar inligting oor die voorval is nog vaag.

"Dit is baie, baie tragies. In my hart is ek baie jammer vir Oscar en vir haar ouers. Slegs God se genade kan in hierdie tyd enige verskil maak."

Hy het verder gesê sy seun is baie hartseer en hy het die publiek gevra om nie aannames te maak nie.

Die 26-jarige Oscar, wat erg geskok is, is in aanhouding nadat hy na bewering sy vriendin, die model Reeva Steenkamp, by sy huis in die ooste van Pretoria doodgeskiet het.

Kate Silvers, Pistorius se skakelbeampte in Londen, het gesê sy wil nie in hierdie stadium kommentaar lewer nie.

"Ons sal moontlik later 'n verklaring uitreik," het sy gesê.

Peet van Zyl, Pistorius se bestuurder, en Ampie Louw, die Pretorianer se afrigter, kon nog nie vir kommentaar bereik word nie.

Intussen het die Suid-Afrikaanse Sportkonfederasie en Olimpiese Komitee (Saskok) gesê hy kan nie kommentaar lewer oor die voorval nie.

"Saskok, nes die res van die publiek, weet niks meer as wat in die openbare domein is nie," lui 'n verklaring.

"Die organisasie is in geen posisie om kommentaar te lewer oor die voorval nie, anders as om te sê ons diepste simpatie en medelye met die families nie.

"Daar is 'n polisie-ondersoek soos met enige skietery en dit sal onverantwoordelik en onvanpas wees om kommentaar te lewer tot die amptelike ondersoekproses afgehandel is."

James Evans, president van Atletiek Suid-Afrika, het gesê die beheerliggaam vir die sport kan ook nie kommentaar lewer nie.

"Dit is 'n private aangeleentheid en ons het nie al die feite nie."

Oscar sal na verwagting Donderdagmiddag in die Pretoriase landdroshof verskyn.

– Volg Nuus24 op Twitter