Slagoffers eis R1,2 milj van adv. Barbie
2010-11-03 10:28
Johannesburg – Die slagoffers van die veroordeelde seksmisdadiger Cézanne Visser, oftewel adv. Barbie, dagvaar haar vir R1,2 miljoen, het The Star Woensdag berig.
"Op 'n sielkundige vlak is hulle diep geskend en hulle is verkleineer – veral omdat hulle weeskinders was (ten tyde van die voorval)," het Pieter Coetzee, hul regsverteenwoordiger, gesê.
Die twee slagoffers van Pretoria eis elk R600 000 in skadevergoeding vir die koste van berading en die smart en trauma wat hulle as gevolg van die seksuele mishandeling deur Visser en haar voormalige kêrel, Dirk Prinsloo moes deurmaak.
Die meisies was 11 en 15 jaar oud toe die mishandeling meer as agt jaar gelede plaasgevind het.
Hul regsverteenwoordiger het gesê hul dokumente is by die Pretoriase hooggeregshof ingedien en Visser het 10 hofdae om te reageer.
Visser dien 'n vonnis van sewe jaar tronkstraf uit nadat sy verlede jaar op 11 aanklagte, wat verband hou met seksuele misdade waarby kinders en volwassenes betrokke is, skuldig bevind is.
Prinsloo is tans in 'n tronk in Belarus, Rusland, nadat hy skuldig bevind is aan bankroof. Hy het na Belarus gevlug om die verhoor weens seksmisdade te ontduik.
Visser se derde slagoffer, Jeannine du Plessis (21), het in Maart vanjaar selfmoord gepleeg.
Volg Nuus24 op Twitter
- SAPA