Slagoffer vertel hoe haai hom 'rondpluk'
2012-07-09 13:05
Kaapstad – 'n Man wat onlangs deur 'n haai aangeval is, het in ‘n onderhoud vertel hoe die donker vorm in die water in ‘n “reuse-“ witdoodshaai verander het wat sy tande in sy been ingeslaan het, het die Cape Times berig.
Jacques Mostert (29) van Centurion, het Vrydag saam met vriende by Jongensfontein naby Stilbaai branderplank gery toe die haai hom aangeval het.
“Ek was op pad om uit die water te klim, slegs sowat 15 m in die branders in, toe ek iets gesien het wat verby my swem.
“Ek het eers gedink dit was ‘n dolfyn, maar toe besef ek ek is in die moeilikheid. Ek het ‘n harde slag teen my sy gevoel,” het Mostert Sondag uit die Life Bay Hospitaal in Mosselbaai aan die Cape Times gesê.
“Dit was asof ‘n mal hond my gebyt het, want dit het begin om my been op dieselfde manier te ruk.
“Dit het onder die water ingegaan en het twee keer om my geswem. Ek kon die haai goed sien en hy was massief,” het hy gesê.
Mostert sê hy was vreesbevange en het besluit om “vrede te maak” met wat besig was om met hom te gebeur.
“Ek was regtig bang. Ek is baie gelowig, so ek glo ‘n kalmte het oor my gekom en ek het besluit om op te hou om paniekerig te raak oor iets wat ek nie kan verander nie.
“Dit is toe wat ‘n groot brander gekom het en ek kon uitswem na die strand,” het hy gesê.
Mostert sê hy gaan nie binnekort weer branderplank ry nie.
– Lees die volle berig by die Cape Times
– Volg Nuus24 op Twitter
- SAPA
