Slagoffer van 'Sondagverkragter' vertel van nagmerries
2012-07-31 17:41
Johannesburg – 'n Vyftienjarige meisie, een van die slagoffers van die sogenaamde Sondagverkragter, Johannes Jacobus Steyn, het Dinsdag in die Palm Ridge-landdroshof in Alberton getuig.
"Ek het oor [die aanval] gekom... maar soms kry ek nog nagmerries oor hom," het sy gesê.
Die hof het beveel dat die tiener, wat 12 jaar oud was toe die voorval plaasgevind het, nie geïdentifiseer mag word nie en sy het in camera getuig.
Die tiener het getuig dat sy in 2009 teruggekeer het van ’n winkel in Vanderbijlpark toe ’n man met 'n geweer uit ’n bakkie gespring het. Sy het aanvanklik gedink dit is ’n grap.
Sy is daarna geblinddoek en na ’n onbekende plek geneem, waar sy gedwing is om seksuele dade uit te voer.
“Hy het nie enigiets gedoen nie... of miskien het ek niks gevoel nie,” het sy gesê.
Haar ontvoerder het daarna skielik opgestaan en in sy bakkie geklim.
“Ek het gedink hy gaan oor my ry”.
Sy het na hom geroep maar besef dat hy reeds weg was. Sy sê sy het ’n ander man naby haar gewaar, maar sy was bang dat hy haar gaan verkrag.
Sy het hom uiteindelik genader en om hulp gevra en hy het haar na sy suster geneem en gehelp om haar ouers te kontak.
Haar pa het getuig dat sy nie gehuil het toe sy ontvoer is nie, maar sy was bewus dat iets fout was.
“Sy het dit beter hanteer as wat ons gedink het,” het hy gesê.
– Volg Nuus24 op Twitter.
