Slaggate gebruik vir ‘visvang’, wasgoed was
2010-12-22 10:10
Witbank - “As ons nie in die Vaaldam kan visvang nie, gaan ons sommer hier in een van die baie slaggate in ons eie straat probeer,” het ’n pa van eMalahleni (Witbank) gister geskerts.
Barney Graham (46) se twee dogters, Eloïse (15) en Jennifer (12), het vir die Desember-vakansie uit Orkney by hul pa kom kuier en het beplan om Sondag by die Vaaldam te gaan visvang, toe hulle halfpad soontoe weens die reën besluit het om om te draai.
“Ons het Saterdag reeds alles vir ons uitstappie in my motor gelaai. My dogters wou baie graag gaan visvang en op pad huis toe het ons die idee gekry om ’n bietjie pret te hê,” het hy gesê.
Die gesin het langs een van die meer as 230 slaggate in Gordonstraat stilgehou en ’n stoel en visstok uit die motor gehaal.
Jennifer het daar gesit en gemaak of sy in ’n slaggat, wat met water gevul is, visvang. Verskeie motoriste het gedurende die 20 min. wat hulle daar gesit het stilgehou en met die gesin gesels.
“Een vrou het gelag en gesê sy is seker ons sal grotes vang terwyl ’n ander man gevra het hoeveel ons al gevang het,” het Graham gesê.
Eloïse het glo baie skaam gekry en in die motor gaan wegkruip.
Volgens Graham het hy verlede Donderdag gesien hoe ’n vrou haar vuil wasgoed in ’n slaggat, ook in Gordonstraat, gewas het.
“Sy het daar in die straat dit gewas en toe langs die pad opgehang. Dit was nogal vreemd.”
Die straat is glo sowat 2,4 km lank.
Graham het gesê hy het opgehou tel by 230 slaggate.
- Volg Nuus24 op Twitter.