Slaggat veroorsaak nóg 'n ongeluk
2011-08-01 09:08
Kroonstad - ’n Munisipale amptenaar is die naweek beseer toe hy vermoedelik een van die vele slaggate op die dorp getref en daarna beheer oor sy voertuig verloor het.
Die ongeluk het byna nog skade of straks lewensverlies veroorsaak, omdat die motor naby huise tot stilstand gekom het.
Richard Mokatsanyane (27), ’n klerk aan die Mantsopa-munisipaliteit op Ladybrand, het vermoedelik heupbeserings opgedoen en word in die Netcare-Kroon-hospitaal op die dorp behandel.
Sy wit Volkswagen-motor is ’n wrak.
Mokatsanyane is glo die derde slagoffer binne twee maande van Kroonstad se slaggate.
Intussen het Kroonstadse inwoners en sakelui reeds stappe begin doen vir een van die grootste beplande hofaksies nog teen swak munisipale dienslewering met die klem op die toestand van die dorp se strate.
Mokatsanyane se pa, Kadimo, sê sy seun het in die omgewing van die duikweg in Noordweg vermoedelik ’n slaggat getref. Een van die bande het glo gebars.
“Hy het beheer verloor en sy voertuig het die pad verlaat.”
Mokatsanyane se voertuig het in ’n stuk veld tot stilstand gekom.
’n Paar meter verder sou die motor klaarblyklik teen een van die huise in die woongebied Charl Malanville gebots het of deur die Heck-roodtpark-ontspanningsaal gebars het.
Hennie Beukes (28) van die woongebied Brentpark op Kroonstad was in Mei saam met drie kollegas ná werk op pad na Brentpark toe die Mazda waarin hulle gery het, glo reg van voor teen ’n Isuzu-bakkie gebots het. Na bewering het een van die voertuie vir ’n slaggat in Sewende Laan in die nywerheidsgebied uitgeswaai en voor die ander beland. Beukes het gesterf en die ander is beseer.
Charl Poolman, voormalige DKD-hoë in die Noord-Vrystaat, het tydelik in ’n rolstoel beland nadat hy ná ’n ernstige rugoperasie in ’n slaggat op die dorp getrap het. Skroewe in Poolman se rug, wat van sy werwels vashou, het uitgeruk.
Die Kroonstad Gatvol Besigheidsaksie, ’n apolitieke groep sakelui en inwoners van Kroonstad wat dié regsaksie voer, word sterk ondersteun omdat dit die liggie in die tonnel is om Kroonstad van algehele verval te red.
Volg Nuus24 op Twitter.
- Volksblad