Slaggat-slagoffer kry R1,7 miljoen
2011-12-08 13:09
Polokwane – 'n Man is skadevergoeding van R1,7 miljoen toegeken nadat hy van 'n bakkie af geslinger is toe dié voertuig 'n slaggat getref het, het The Star Donderdag berig.
Die ongeluk het in 2008 op die Burgersfort-pad plaasgevind en die provinsie se departement van paaie en vervoer het ingestem om die eis te betaal.
Die eis is in die Pretoriase hooggeregshof afgehandel nadat Hermanus Mare (24) ernstige beenbeserings opgedoen het.
Mare was drie maande lank in die hospitaal en moes twee jaar met krukke loop. Hy loop mank en kan nie lank staan nie.
Hy kon weens sy beserings nie terugkeer na sy werk by 'n myn nie. Mare het in hofdokumente aangevoer die departement moes die pad in stand gehou het en 'n waarskuwingsteken opgerig het om padgebruikers oor die slaggat te waarsku.
Mare was agterop 'n bakkie toe die ongeluk plaasgevind het.
– Volg Nuus24 op Twitter
- SAPA