Slaggat kos egpaar byna al hul skilderye
2011-04-21 07:35
Bloemfontein - Die haglike toestand van die land se paaie het vir ’n Bloemfonteinse skilder-egpaar groot skade berokken toe byna al hul kunswerk in vlamme verwoes is kort nadat hulle ’n slaggat getref het.
Die egpaar Kotzé het verdwaas toegekyk hoe 73 geraamde skilderye, waarvan 43 hul eie unieke werke is, tot niet gaan.
Hoewel erg geskok, was Kobus Kotzé, en sy vrou, Joe, albei wonderbaarlik ongedeerd.
Die voorval het Sondagmiddag laat aan die voet van die Olivierspas plaasgevind.
Die egpaar vermoed hul voertuig, ’n Renault Trafic-bestelwa, het weens ’n kortsluiting aan die brand geslaan kort nadat hulle onvermydelik ’n reuse-slaggat getref het.
Hulle was op pad na KwaZulu-Natal om ’n week lank van Winterton tot die Suidkus hul kunswerk aan getroue klante by hul galerye te gaan bemark.
Die egpaar sê hulle gaan een keer per jaar op so ’n reis.
Mnr. Kotzé het een kunswerk, ’n Oos-Vrystaatse landskap, spesiaal op versoek van een van die galerye geskep.
Die kunswerk, waaronder ook van ander kunstenaars wat hulle in hul twee plaaslike galerye verkoop, het ’n waarde van sowat R470 000 gehad. Al hul bagasie, dokumente en hul kamera het ook in die slag gebly.
Dit gaan die “beste deel van ’n jaar” vat om weer die hoeveelheid werk in te haal, sê hulle.
Die voertuig, waarvan net “stukkies yster” oorgebly het, was skaars ’n jaar oud.
Die egpaar het wel versekering vir die kunswerke en die voertuig.
“So drie kilometer nadat ons die slaggat getref het, het rook uit die enjinkap begin borrel. Ons het besef die voertuig brand.”
Hulle sê dis die erge toestand van die land se paaie wat vir dié ongeluk, wat hul lewe kon geëis het, verantwoordelik was.
Mev. Kotzé sê sy weet nie hoe nie, maar sy het kans gehad om haar handsak onder haar sitplek te gryp en te hardloop.
Sy sê hulle het ver weg van die voertuig beweeg in geval dit ontplof.
Oor die traumatiese ervaring sê die egpaar dat dit nie net die materiële verlies is nie, maar dat hulle ook emosionele trauma beleef het.
“Dis net genade dat ons leef. Ons is ontsettend dankbaar.
“Dis nou nie net van gaan sit weer en verf nie.
“’n Mens moet emosioneel ingestel wees.”
Mnr. Kotzé sê hulle kan nie anders as om net weer aan die werk te spring nie.
“Hulle sê mos werk is 1% inspirasie en 99% perspirasie.
“Baie van die kunswerk was uiters besonders, onvervangbaar, maar ons gaan maar net moet. Dis ons heeltydse beroep, ons inkomste,” sê hy.
- Volksblad