Skuif van parlement na Pta weer op die tafel
2011-11-24 08:06
Kaapstad. – Die ANC het die verskuiwing van die parlement na Pretoria Woensdag weer vierkant op die tafel geplaas.
’n Senior ANC-LP, Vincent Smith, het in vraetyd in die Nasionale Vergadering gesê die feit dat die parlement in Kaapstad gesetel is, moet “dringend” hersien word.
“Die besluit om die uitvoerende gesag, die wetgewer en die regbank op aparte plekke te huisves was die gevolg van ’n politieke skikking in 1910 deur ’n wit regering,” het Smith gesê.
Hy is voorsitter van die portefeuljekomitee oor korrektiewe dienste en woon in Gauteng.
“Daardie besluit het na my mening tot onnodige koste gelei wat betref reis, huisvesting en produktiwiteit. Ná 17 jaar (ná die koms van demokrasie) dink ek dit het tyd geword dat hierdie besluit hersien word.
“Geld wat aan hierdie uitgawes bestee word, kan elders benut word waar dit nodiger is.”
Graham McIntosh, Cope-LP, het voorgestel dat sou die parlement na Pretoria verskuif word, die geboue in Kaapstad vir die Pan-Afrika-parlement (PAP) gebruik word.
Pravin Gordhan, minister van finansies, het gesê Smith en McIntosh vra geldige vrae.
“Ek is maar net ’n nederige minister; lede is welkom om die saak te bespreek.”
Volgens hom het die reiskoste vir tesourie-amptenare tussen April en Oktober vanjaar meer as R5 miljoen bedra.
Volg Nuus24 op Twitter.
- Die Burger