Skrap héle tolplan, eis Moederstad
2011-11-03 08:03
Kaapstad – Besluite van twee nasionale ministers om die omstrede N1- en N2-Wynland-tolprojekte goed te keur, was “strydig met die wet” en daarom behoort die hele tolprojek herroep te word.
Dít is die mening van die Kaapse stadsraad, wat nou daartoe gelei het dat die burgemeester, Patricia de Lille, dit oorweeg om dispute met dié minister van vervoer en die minister van waterwese en omgewingsake te verklaar.
Die stadsraad wil verder ’n skriftelike onderneming van die minister van vervoer, mnr. S’bu Ndebele, hê dat hy wel die Suid-Afrikaanse Nasionale Padagentskap (Sanral) skriftelik ingelig het dat daar ’n moratorium op verdere stappe vir tolpaaie geplaas is.
Ndebele het Sanral op 23 Oktober opdrag gegee om sy prosesse om tolpaaie te bou eers te staak sodat daar met die betrokke partye gekonsulteer kan word.
Die stappe is gister deur die Kaapse burgemeesterskomitee bespreek en die stadsraad moet nou op sy volgende raadsvergadering besluit of De Lille gemagtig gaan word om amptelike inter-regeringsdispute met die ministers te verklaar.
Die stadsraad het reeds regsadvies gekry en glo dat die besluite aanvegbaar is en tersyde gestel kan word.
Die proses word deur die stadsraad as uiters dringend beskou, omdat die tyd beperk is om ’n inter-regeringsdispuut te verklaar.
Volgens die stadsraad is die impak van die tolpaaie op die gemeenskap en die ekonomie nie deur die minister van waterwese en omgewingsake in ag geneem toe hy die tolpaaie goedgekeur het nie.
Die minister van vervoer het ook sy besluit geneem dat die bepaalde dele van die N1 en N2 as tolpaaie geregistreer word sonder dat daar openbare vergaderings gehou is waar die betrokke gemeenskappe en Kaapse stadsraad insette oor die tolpaaie kon lewer.
Brett Herron, burgemeesterskomiteelid vir vervoer, paaie en stormwater, het in ’n brief aan Ndebele ook gevra dat hy die stadsraad drie maande kennis sal gee alvorens Sanral weer die groen lig gegee word om sy tolpadplanne voort te sit. Die versoek is gerig sodat die stadsraad sy stappe in plek kan kry om verdere regsoptrede te verseker.
– Volg Nuus24 op Twitter
- Die Burger